ಕುಂಬಳೆಯ ಚಿರಂಜೀವಿ (ರಿ) ಕ್ಲಬ್ಬಿನ ಮಾಸಿಕ ಸಭೆ ಭಾನುವಾರ ಸಂಜೆ 4 ಗಂಟೆಗೆ ಕ್ಲಬ್ಬಿನ ಅಧ್ಯಕ್ಷರಾದ ಶ್ರೀ ಬಾಲಕೃಷ್ಣ ಗಟ್ಟಿ ಕೋಟೆಕಾರ್ ಹಾಗೂ ಉಪಾಧ್ಯಕ್ಷರಾದ ಕೆ.ಸಿ. ಮೋಹನ್ ಅವರ ನೇತೃತ್ವದಲ್ಲಿ ನಡೆಯಿತು. ಈ ಸಭೆಯನ್ನು ವಿಭಿನ್ನ ರೀತಿಯಲ್ಲಿ ಸಮಾಜ ಸೇವಾ ಕಾರ್ಯಕ್ರಮಗಳ ಮೂಲಕ ಆಯೋಜಿಸಲಾಯಿತು.
ಚಿರಂಜೀವಿ ಕ್ಲಬ್ ಮತ್ತು ಸಂಜೀವಿನಿ ಟ್ರಸ್ಟ್ನ ಜಂಟಿ ಆಶ್ರಯದಲ್ಲಿ ಕುಂಬಳೆ ಸಮೀಪದ ಎರಡು ಬಡ ಕುಟುಂಬಗಳಿಗೆ ವೈದ್ಯಕೀಯ ನೆರವು ನೀಡಲಾಯಿತು. ಶಾಂತಿಪಳ್ಳದ ಶ್ರೀ ಯಶವಂತ್ ಕುಮಾರ್ ಅವರು ಕರುಳು ಸಂಬಂಧಿ ಕಾಯಿಲೆಗೆ ಶಸ್ತ್ರಚಿಕಿತ್ಸೆಗೆ ಒಳಪಟ್ಟಿದ್ದು, ನಂತರದ ಔಷಧೋಪಚಾರಕ್ಕಾಗಿ ಅಗತ್ಯವಿರುವ ಆರ್ಥಿಕ ಸಹಾಯವನ್ನು ಕ್ಲಬ್ ವತಿಯಿಂದ ಒದಗಿಸಲಾಯಿತು.
ಇದಲ್ಲದೆ, ಕೊಯಿಪಾಡಿ ಕಡಪ್ಪರದ ಚಂದ್ರಿಕಾ ಅವರು ತಲೆಯ ಶಸ್ತ್ರಚಿಕಿತ್ಸೆಯ ನಂತರ ಮನೆಯಲ್ಲೇ ಚೇತರಿಸಿಕೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಅವರಿಗೆ ಸಹ ವೈದ್ಯಕೀಯ ನೆರವು ನೀಡಲಾಯಿತು. ಈ ನೆರವಿಗಾಗಿ ಚಿರಂಜೀವಿ ಸದಸ್ಯರು, ಅರಿಕಾಡಿ ಗೋಪಾಲ್ ಕುಂಬ್ಳೆ, ಶಿವ ಶಂಕರ್ ನೆಕ್ರಜೆ, ಕೆ.ಸಿ. ಮೋಹನ್ ಸೇರಿದಂತೆ ಹಲವರು ಧನಸಹಾಯ ನೀಡಿ ಮಾನವೀಯತೆ ಮೆರೆದರು.
ಶಸ್ತ್ರಚಿಕಿತ್ಸೆಯ ನಂತರ ದೈನಂದಿನ ಜೀವನ ಸಾಗಿಸಲು ಸಂಕಷ್ಟ ಅನುಭವಿಸುತ್ತಿರುವ ಬಡ ಕುಟುಂಬಗಳಿಗೆ ನೀಡಿದ ಈ ಸಹಾಯವು ಸಮಾಜದಲ್ಲಿ ಮಾದರಿಯಾಗಿದೆ ಎಂದು ಸ್ಥಳೀಯರು ಅಭಿಪ್ರಾಯಪಟ್ಟಿದ್ದಾರೆ.
ಇದೇ ಸಂದರ್ಭದಲ್ಲಿ ಚಿರಂಜೀವಿ ಕ್ಲಬ್ ಹಾಗೂ ಸಂಜೀವಿನಿ ಟ್ರಸ್ಟ್ನ ಹಿತೈಷಿಯಾದ ಶ್ರೀ ಶಿವಶಂಕರ್ ನೆಕ್ರಜೆ ಅವರನ್ನು ಸ್ಮರಣಿಕೆ ನೀಡಿ ಗೌರವಿಸಲಾಯಿತು. ಜೊತೆಗೆ ಕ್ಲಬ್ಬಿನ 40ನೇ ವರ್ಷದ ಸ್ಮರಣ ಸಂಚಿಕೆಯನ್ನು ಅವರಿಗೆ ನೀಡಲಾಯಿತು.
ಈ ಕಾರ್ಯಕ್ರಮವು ಸಮಾಜ ಸೇವೆಯ ಮಹತ್ವವನ್ನು ಸಾರುವಂತೆ ಯಶಸ್ವಿಯಾಗಿ ನೆರವೇರಿತು.“ಸಮಾಜದ ನೋವಿಗೆ ಸ್ಪಂದಿಸಿದ ಈ ಮಾನವೀಯ ಕಾರ್ಯ, ಒಗ್ಗಟ್ಟಿನ ಶಕ್ತಿಯ ಮಹತ್ವವನ್ನು ಮತ್ತೊಮ್ಮೆ ಸಾಬೀತುಪಡಿಸಿತು.”
