ಆಟಿದ ಪೊರ್ಲು ಸಂಸ್ಕೃತಿದ ಅನಾವರಣ .ಇನಿ ಆಟಿ ಅಮಾಸೆ.

ವರ್ಷ 12 ತಿಂಗೊಳ್ದ್ ಆಟಿದ ತಿಂಗೊಳು ತುಳುವೆರೆಗ್ ಬಾರಿ ಪೆರ್ಮೆದ ಒಂಜಿ ತಿಂಗೊಳು.ಆನಿದ ಕಾಲದ ಆಟಿ ತುಳುವೆರೆನ ಬಡವುದ ಬದ್ಕ್ ಆದ್ ಸಂಸ್ಕೃತಿದ ಅನಾವರದ ಬದ್ಕ್ ಲಾ ಅಂಡ್. ಎಂಚ ಪಂಡಾ ಆಟಿದ ತಿಂಗೊಳ್ದ್ ತಿನ್ಪುನ ತೆನಾಸ್ ,ಮಲ್ಪುನ ಆಚರಣೆಲು ಮಾತಾ ನಮ್ಮ ಸಂಸ್ಕೃತಿದ ಪೊಲಬುನು ತೆರಿಪಾವಲೆಕ ಆಂಡ್ .

ಈ ಒಂಜಿ ತಿಂಗೊಳ್ದ್ ನಮ ಮನ್ಪುನ ಆಚರಣೆಲು, ತಿನ್ಪುನ ತೆನಾಸ್ ಗ್ಲಾ ಒಂಜಿ ವೈಜ್ಞಾನಿಕ ಕಾರಣ ಉಂಡು .ಆಟಿದ ತಿಂಗೊಳ್ದ್ ತುಳುನಾಡ್ ದ ಸಾರಾಮನಿ ಸತ್ಯೋಳು ಘಟ್ಟ ಮಿತ್ಥರ್ವೆರ್ ಪನ್ಪುನ ನಂಬೊಲಿಕೆ.ಅಂಚ ಸತ್ಯೋಳು ಘಟ್ಟ ಮಿತ್ಥರ್ನಗ ಈ ಊರುದ ಮಾರಿ ,ಸಿರ್ಕ್ ಸಂಕಟ ಕಳೆಯೆರೆ ಮಾಯದ ರೂಪೊಡು ಆಟಿ ಕಳಂಜೆ ಇಲ್ಲಇಲ್ಲಗ್ ಬರ್ಪುಂಡು.ನಿಜವಾದ್ಲಾ ಆಟಿ ಕಳಂಜೆ ಪನ್ಪುನವು ಒಂಜಿ ಮಾಯಾಶಕ್ತಿ .ಪಂದ್ ಐತ ಸಂದಿಡ್ ತೆರಿದ್ ಬರ್ಪುಂಡು .ಎಂಚ ಪಂಡಾ
ಮಯೊಡು ಪುಟ್ಟೊಂದೇ ಕಳಂಜೆ
ಮಾಯದ ಅರಸು ಮಗೆ
ಜೋಗೋಡು ಪುಟ್ಟೊಂದೇ
ಕಳಂಜೆ ಜೊಗಂದರಸು ಮಗೆ..

ಅಂಚ ಪನ್ನಗ ಐತಾ ಪೊಲಬು ನಮಕ್ ತೆರಿದ್ ಬರ್ಪುಂಡು .ಆಟಿ ಕಳಂಜೆ ಊರುಗು ಬತ್ತಿನ ಮಾರಿನ್ ಕಳೆಯೆರೆ ಬತ್ದ್ ಪ್ರಾಣಿ ಪಕ್ಷಿಲೆನ ಸಿರ್ಕ್ ಸಂಕಟನ್ ದೂರ ಮಲ್ಪುಂಡು .
ಪಂದ್ ಐತ ಸಂಧಿಡೆ ಪಂಪುಂಡು .ಎಂಚ ಪಂಡಾ
ಆಟಿಡ್ ಬರ್ಪೆನ ಕಳಂಜೆ
ಮಾರಿ ಕಳೆಪೆನಾ……..
ಸೋಣೊಡು ಬರ್ಪೆನ ಕಳಂಜೆ
ಸೋಲು ಕಳೆಪೆನಾ ………

ಅಂಚನೆ ಪೆತ್ತ ಕೈಕಂಜಿ ಲೆಗ್ ಪ್ರಾಣಿ ಪಕ್ಷಿಲೆಗ್ ಬರ್ಪಿನ ಮಾತಾ ಸಿರ್ಕ್ ಸಂಕಟಲೆನ್ ಕಡಲ್ದಂಚಿ ಪಾರಾಳೆ ಪನ್ಪುನ ಬಿನ್ನಯಲ ಐಟ್ ಉಂಡು .
ಮಾತ್ರ ಅತ್ತಂದೆ ಅಪಗ ಬಂಜಿದ ಬಡವು ಯೇತ್ ಇತ್ನ್ದ ಪನ್ಪುನ ವಿಚಾರಲ ಸಂಧಿಡ್ ಉಂಡು .ಎಂಚ ಪಂಡಾ
ಬಾರೆದ ದಂಡ್ ತಿಂದೇನ ಕಳಂಜೆ
ಬಂಜಿ ಬುಲೆಪಾಯೆನಾ ……….
ಕೇನೆದ ಕಂಡೆ ತಿಂದೇನ ಕಳಂಜೆ
ದೊಂಡೆ ಕಿರಂಬಾಯೆನ್ ……
ಉಂದೆಟ್ ಆನಿದ ಕಾಲದ ಬಡ ಪತ್ ದ ವಿವರಲ ಉಂಡು .ಆತ ಬಡಪತ್ ಇತ್ ದಲ ಪ್ರಕೃತಿದ ವಸ್ತುಲೆನ್ ನಮ ತಿನೋಡು.ಐಟ್ ಎಡ್ಡೆ ಸತ್ವಾಲ ಉಂಡು ಸತ್ಯಲ ಉಂಡು .ಉಂದುಪನ್ಪುನ ವಿಚಾರ ನಮಕ್ ತೆರಿದ್ ಬರ್ಪುಂಡು ಅಂಚೆನೇ ತುಳುನಾಡ್ ನ್ ಸೃಷ್ಟಿ ಮಂತಿನ ಬೆಮ್ಮೆರ್ ಬಗ್ಗೆಳ ನೆಟ್ ಉಲ್ಲೇಖ ಉಂಡು.ಪಂಡಾ ಕಳಂಜೆ ನ ಸೃಷ್ಟಿ ದ ಬಗ್ಗೆಳ ಅಪ್ಪೆ ಅಮ್ಮೆರ್ನ ಬಗ್ಗೆ ತೆರಿದ್ ಬರ್ಪುಂಡು ಎಂಚ ಪಂಡಾ

                    ಕಳಂಜೆ ಕಳಂಜೆ ನಾ 
                     ಕಳಂಜೆ ಗ್ ಅಪ್ಪೆ ಬೆರ್ಮೆರ್ 
                   ಕಳಂಜೆ ಕಳಂಜೆ ನಾ 
                     ಕಳಂಜೆ ಗ್ ಅಮ್ಮೆ ಬೆರ್ಮೆರ್ 

ಪನ್ನಗ ಈ ಭೂಮಿನ್ ಸೃಷ್ಟಿ ಮಲ್ತಿನ ಬೆಮ್ಮೆರ್ನ ಬಗ್ಗೆ ತೆರಿದ್ ಬರ್ಪುಂಡು
ಆಟಿದ ತಿಂಗೊಳ್ದ್ ಬರ್ಪಿನ ಆಟಿದ ಅಮಾವಾಸ್ಯೆ ತುಳುವೆರೆಗ್ ಪೂರಾ ಬಗೆಟ್ ಲಾ ಮಾದಪೇರೆ ಆವಂದಿನ ದಿನ . ಈ ದಿನತಾನಿ ಪಾಲೆದ ಕೆತ್ತೆದ ಕಷಾಯ ಪರ್ಪುನನೇ ಒಂಜಿ ವಿಶೇಷ .ಐಟ್ ಸಾರ ಸಾರ ಮರ್ದ್ ದ ಅಂಶೋಳು ಉಪ್ಪುನ ಈ ಕಷಾಯನ್ ಪರ್ ನೆಂಡಾ ಒವ್ವೆ ರೀತಿದ ಸೀಕ್ ಸಂಕಟ ಬರ್ಪುಜಿ ಗೆ .ಅಂಚಾದ್ ನಮಕ್ ಇಂದೆನ್ ಖುಷಿ ಬತಿಲೆಕನೇ ಪರಿಯೆರೆ ಆಪುಜಿ.ಐಟ್ ಲ ಒಂಜಿ ಸಂಪ್ರದಾಯ ,ಆಚರಣೆ ಉಂಡು ,ಎಂಚ ಪಂಡಾ ಈ ಪಾಲೆದ ಮರತ ಕೆತ್ತೆನ್ ಪುಲ್ಯ ಕಂಡೆ ಪಂಡಾ ಬೊಲ್ಪು ಆಪುನೆಕ್ ದುಂಬೇ ಇಂದೆತ ಕೆತ್ತೆನ್ ಕೆತ್ತ್ದ್ ಆವೊಡು .ಆ ಕೆತ್ತೆನ್ ಕಲ್ಲ್ ಡ್ ಗುದ್ದುದ್ ದೆಪ್ಪೊಡು .ಬೇತೆ ವಾ ಒಂಜಿ ವಸ್ತುನ್ ಬಲಸ್ದ್ ಕೆತ್ತೆನ್ ಕೆತ್ತೆರೆ ಬಲ್ಲಿ.ಕರ್ಬದ ವಸ್ತು ಉಪಯೋಗ ಮಲ್ಪೆರೆ ಬಲ್ಲಿ.ಅಂಚ ದೆತ್ತಿನ ಕೆತ್ತೆದ ಚೋಲಿ ದೇತ್ದ್ , ಕಡೆಪಾಲ್ ಡ್ ಅವೆನ್ ಗುದ್ದುದು ಎಡ್ಡೆ ಮುಂಚಿ , ಜೀರಿಗೆ , ಬೆಳ್ಳುಳ್ಳಿ ನ್ ಸೇರಾದ್ ಗುದ್ದುದ್ ಅವೆತ ರಸನ್ ಪುಂಟುದ್ ಐಕ್ ಬೊಳ್ಳು ಕಲ್ಲ್ ಬೆಚ್ಚ ಮಂತ್ದ್ ಐಕ್ ಪಾಡ್ದ್ ಚವುಳಿ ಆಯಿ ಬೊಕ್ಕ ಅವೆನ್ ಪರೋಡ್.ಅಮಾಸೆದ ದುಂಬುನಾನಿ ಮರತ ಕೈತಲ್ ಪೋದು ಮರಕ್ ಒಂಜಿ ಗುರ್ತ ಮಂತ್ ದೀವೊಡು .ದಾಯೆ ಪಂಡಾ ಅಮಾಸೆ ದಾನಿ ಕಾಂಡೆ ಕತ್ತಲೆಗ್ ಪೋಪುನ ಕಾರಣ ಮರ ಬದಲಿಯೆರೆ ಬಲ್ಲಿಂದ್ ಒಂಜಿ ಮುಂಜಾಗ್ರತೆ ಉಂದು ಭಾರಿ ಉಷ್ಣ ಗೆ .ಐಕ್ ತಂಪು ಆಯೆರೆ ಮೆತ್ತೆದ ಗಂಜಿ ,ಪಚ್ಚೆ ಪದೆಂಜಿ ದ ಗಂಜಿಲ ಉನ್ ಪೆರ್ .ಈ ಕಷಾಯ ಬಾರಿ ಕೈಫ್ ನಳ ಮಸ್ತ್ ಮರ್ದ್ ದ ಅಂಶ ಉಂಡು.

ನಮ್ಮ ಪಿರಿಯಾಕುಲು ಮಲ್ತಿನ ಈ ಒಂಜಿ ಪದ್ಧತಿನ್ ಇತ್ತೆಲ ನಮ ಅನುಸರಿಸುನೆ ನಮ್ಮ ಸಂಸ್ಕ್ರಿತಿನ್ ಒರಿಪಾವ್ ಲೆಕನೇ ಆಪುಂಡು .

✍️SURESH MANGALPADY