ಇಚ್ಚಿಲಂಗೋಡು, : ಎಂಟು ದಶಕಗಳ ಶಿಕ್ಷಣ ಪರಂಪರೆಯನ್ನು ಹೊಂದಿರುವ ಇಸ್ಲಾಮಿಯ ಎ.ಎಲ್.ಪಿ. ಶಾಲೆ ಇಚ್ಚಿಲಂಗೋಡಿನಲ್ಲಿ 80ನೇ ವಾರ್ಷಿಕೋತ್ಸವವನ್ನು ಏಪ್ರಿಲ್ 4ರಂದು ಶನಿವಾರ ಮಧ್ಯಾಹ್ನ 2 ಗಂಟೆಯಿಂದ ಬೀರೋಲಿಕ ಮೈದಾನದಲ್ಲಿ ಭರ್ಜರಿಯಾಗಿ ಆಚರಿಸಲಾಗುತ್ತಿದೆ. ಶಾಲೆಯ 80 ವರ್ಷಗಳ ಇತಿಹಾಸವನ್ನು ದಾಖಲಿಸಿದ ಸ್ಮರಣಿಕೆ (ಸೋವನೀರ್ ) ಬಿಡುಗಡೆ ಕಾರ್ಯಕ್ರಮ ಈಗಾಗಲೇ ಯಶಸ್ವಿಯಾಗಿ ನೆರವೇರಿದೆ ಎಂದು ಆಯೋಜಕರು ತಿಳಿಸಿದ್ದಾರೆ.
ವಾರ್ಷಿಕೋತ್ಸವವನ್ನು ಮಂಜೇಶ್ವರ ಸಹಾಯಕ ಶಿಕ್ಷಣಾಧಿಕಾರಿ ಜಾರ್ಜ್ ಕ್ರಾಸ್ಟ ಉದ್ಘಾಟಿಸಲಿದ್ದಾರೆ. ಕುಂಬಳೆ ವಲಯದ ಸಿಐ ಬೈಜು ಕೆ. ಜೋಸ್ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ಪಿಟಿಎ ಅಧ್ಯಕ್ಷ ನಸೀಂ ಇಚ್ಚಿಲಂಗೋಡುಸ್ವಾಗತಿಸಲಿದ್ದು, ಕಾರ್ಯಕ್ರಮ ಸಮಿತಿ ಅಧ್ಯಕ್ಷ ಮಜೀದ್ ಪಚ್ಚಂಬಳ ಅಧ್ಯಕ್ಷತೆ ವಹಿಸಲಿದ್ದಾರೆ. ಮುಖ್ಯೋಪಾಧ್ಯಾಯ ಜಿಜೇಶ್ ಅಮುಗ ಭಾಷಣ ಮಾಡಲಿದ್ದಾರೆ.
ಈ ಸಂದರ್ಭದಲ್ಲಿ ಶಾಲಾ ವ್ಯವಸ್ಥಾಪಕ ಮೊಹಮ್ಮದ್ ಅನ್ಸಾರಿ ಶೇಖ್ ಹಾಗೂ ಶಾಲೆಯ ಹೊಸ ಅಡಿಗೆಮನೆ ನಿರ್ಮಾಣಕ್ಕೆ ಸಹಕರಿಸಿದ ಗುತ್ತಿಗೆದಾರ ಸಾಬೀರ್ ಮತ್ತು ಸುವಿನೀರ್ ವಿನ್ಯಾಸಕರಾದ ತರಣಾಥ್ ಅವರನ್ನು ಸನ್ಮಾನಿಸಲಾಗುತ್ತದೆ. ಅಗಲಿದ ಮಾಜಿ ಮುಖ್ಯೋಪಾಧ್ಯಾಯ ರಂಜಿತ್ ಮಾಸ್ಟರ್ ಅವರ ಸ್ಮರಣಾರ್ಥ ನಿಧಿ ವಿತರಣೆ ಹಾಗೂ ‘ಮೇಘ ಕ್ವಿಜ್ ಸ್ಪರ್ಧೆಯ ವಿಜೇತರಿಗೆ ಬಹುಮಾನ ವಿತರಣೆ ನಡೆಯಲಿದೆ.
ಸಾರ್ವಜನಿಕ ಸಭೆಯ ಬಳಿಕ ವಿದ್ಯಾರ್ಥಿಗಳಿಂದ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆಯಲಿವೆ. ರಾತ್ರಿ 8 ಗಂಟೆಯಿಂದ ರಾಜ್ಯ ಪ್ರಶಸ್ತಿ ಪುರಸ್ಕೃತ ಸುಧೀರ್ ಮಡವೂರು ನೇತೃತ್ವದ ‘ಮ್ಯಾಜಿಕ್ ಸ್ಲೀಸಿಲ 30’ ಮ್ಯಾಜಿಕ್ ಶೋ ಹಾಗೂ ಕೊಜ್ಹಿಕೋಡು ಏಕೋ ಮ್ಯೂಸಿಕಲ್ ಬ್ಯಾಂಡ್ನಿಂದ ಗಾಯನ ಕಾರ್ಯಕ್ರಮ ಏರ್ಪಡಿಸಲಾಗಿದೆ. ಶಾಲೆಯ 80ನೇ ವಾರ್ಷಿಕೋತ್ಸವ ಕಾರ್ಯಕ್ರಮದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ಸ್ಥಳೀಯರು ಹಾಗೂ ಪೋಷಕರಿಗೆ ಸಂಘಟನಾ ಸಮಿತಿ ಮನವಿ ಮಾಡಿದೆ.
ಪತ್ರಿಕಾಗೋಷ್ಠಿಯಲ್ಲಿ ಕಾರ್ಯಕ್ರಮ ಸಮಿತಿ ಅಧ್ಯಕ್ಷ ಮಜೀದ್ ಪಚ್ಚಂಬಳ , ಪ್ರಧಾನ ಸಂಚಾಲಕ ಹಸನ್ ಇಚ್ಚಿಲಂಗೋಡು, ಪಿಟಿಎ ಅಧ್ಯಕ್ಷ ನಸೀಂ ಮೊಗರ್, ಮುಖ್ಯೋಪಾಧ್ಯಾಯ ಜಿಜೇಶ್ ಹಾಗೂ ಬಶೀರ್ ಉಪಸ್ಥಿತರಿದ್ದರು.
