ಮಂಜೇಶ್ವರ : ಮಂತ್ರವಾದ ಚಿಕಿತ್ಸೆಯ ಹೆಸರಿನಲ್ಲಿ 17 ವರ್ಷದ ಬಾಲಕಿ ಮೇಲೆ ದೌರ್ಜನ್ಯವೆಸಗಿ, ಬಳಿಕ ಆಕೆಯ ತಾಯಿಯೊಂದಿಗೇ ಪರಾರಿಯಾಗಿದ್ದ ನಕಲಿ ಮಂತ್ರವಾದಿ ಮಲಪ್ಪುರಂ ಮೂಲದ ಜಸಲ್ ತಂಘಳ್ ಎಂಬಾತನನ್ನು ಮಂಜೇಶ್ವರದಲ್ಲಿ ಪೊಲೀಸರು ಬಂಧಿಸಿದ್ದಾರೆ.
ಚಿಕಿತ್ಸೆಗಾಗಿ ಮನೆಗೆ ಬರುತ್ತಿದ್ದ ಬಾಲಕಿಯ ಮೇಲೆ ಅತ್ಯಾಚಾರ ಎಸಗಿದ್ದ ಈ ನಕಲಿ ಮಂತ್ರವಾದಿ, ಆಕೆಯ ತಾಯಿಯ ಜೊತೆ ಸಲುಗೆ ಬೆಳೆಸಿ ಆಕೆಯನ್ನೂ ಕರೆದುಕೊಂಡು ನಾಪತ್ತೆಯಾಗಿದ್ದ.
ಕರ್ನಾಟಕ-ಕೇರಳ ಗಡಿಯ ಆನೆಕಲ್ಲು ಪ್ರದೇಶದಲ್ಲಿ ಇಬ್ಬರೂ ರಹಸ್ಯವಾಗಿ ತಂಗಿದ್ದಾರೆಂಬ ಖಚಿತ ಮಾಹಿತಿಯ ಮೇರೆಗೆ ಮಂಜೇಶ್ವರ ಪೊಲೀಸರು, ಎಡವಣ್ಣ ಪೊಲೀಸರು ಹಾಗೂ ನಿಲಂಬೂರು ಎಸ್‌ಎಂಡಿ ಜಂಟಿ ಕಾರ್ಯಾಚರಣೆ ನಡೆಸಿ ಆರೋಪಿಯನ್ನು ವಶಕ್ಕೆ ಪಡೆದಿದ್ದಾರೆ.
ಹಲವರಿಗೆ ಮಂತ್ರವಾದದ ಚಿಕಿತ್ಸೆ ನೀಡುವುದಾಗಿ ನಂಬಿಸುತ್ತಿದ್ದ ಈತನನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ನ್ಯಾಯಾಂಗ ಬಂಧನ ವಿಧಿಸಲಾಗಿದೆ.
