ಪೋರ್ಟ್ ವಿಲಾ: ದಕ್ಷಿಣ ಪೆಸಿಫಿಕ್ ಮಹಾಸಾಗರದ ವನವಾಟು ದ್ವೀಪಗಳ ಪ್ರದೇಶದಲ್ಲಿ ಶನಿವಾರ 7.2 ಮತ್ತು 6.9 ತೀವ್ರತೆಯ ಎರಡು ಪ್ರಬಲ ಭೂಕಂಪಗಳು ಸಂಭವಿಸಿವೆ ಎಂದು ಅಮೆರಿಕದ ಭೂವೈಜ್ಞಾನಿಕ ಸಮೀಕ್ಷೆ (USGS) ಪ್ರಾಥಮಿಕ ಮಾಹಿತಿ ನೀಡಿದೆ.
ಮೊದಲ ಭೂಕಂಪದ ಬಳಿಕ ಸುಮಾರು 25 ಸೆಕೆಂಡುಗಳ ಅಂತರದಲ್ಲಿ ಎರಡನೇ ಕಂಪನ ಸಂಭವಿಸಿದ್ದು, ಎರಡೂ ಭೂಕಂಪಗಳ ಕೇಂದ್ರಗಳು ಸಮುದ್ರದ ಅಡಿಯಲ್ಲಿ ಸುಮಾರು 10 ಕಿ.ಮೀ ಆಳದಲ್ಲಿದ್ದವು ಎಂದು ವರದಿಯಾಗಿದೆ.
ಭೂಕಂಪದಿಂದ ಸಂಭವಿಸಿರುವ ಸಾವು-ನೋವು, ಆಸ್ತಿಪಾಸ್ತಿ ಹಾನಿ ಹಾಗೂ ಸುನಾಮಿ ಅಪಾಯದ ಕುರಿತು ಈವರೆಗೆ ಅಧಿಕೃತ ಮಾಹಿತಿ ಲಭ್ಯವಾಗಿಲ್ಲ. ವನವಾಟು ಭೂಕಂಪನ ಸಕ್ರಿಯ ವಲಯದಲ್ಲಿರುವುದರಿಂದ, ಸ್ಥಳೀಯ ಅಧಿಕಾರಿಗಳ ಸೂಚನೆಗಳನ್ನು ಪಾಲಿಸುವಂತೆ ಕರಾವಳಿ ಪ್ರದೇಶದ ಜನರಿಗೆ ತಿಳಿಸಲಾಗಿದೆ.
