ಅಜ್ಮಾನ್: ತುಂಬೆ ಯೂನಿವರ್ಸಿಟಿ ಹಾಸ್ಪಿಟಲ್‌ನ ಅಂಗಸಂಸ್ಥೆಯಾದ ತುಂಬೆ ಇನ್‌ಸ್ಟಿಟ್ಯೂಟ್ ಆಫ್ ಎಸ್ಥೆಟಿಕ್ಸ್ (TIA) ತನ್ನ ವೈದ್ಯಕೀಯ ಮತ್ತು ಸೌಂದರ್ಯವರ್ಧಕ ಚಿಕಿತ್ಸಾ ಸೇವೆಗಳನ್ನು ಮತ್ತಷ್ಟು ವಿಸ್ತರಿಸಿದೆ. ಅಜ್ಮಾನ್‌ನ ತುಂಬೆ ಮೆಡಿಸಿಟಿಯಲ್ಲಿ ನಡೆದ ಸಂಸ್ಥೆಯ ವಾರ್ಷಿಕ ಅಂತಾರಾಷ್ಟ್ರೀಯ ಸಮ್ಮೇಳನ ಮತ್ತು ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಈ ಮಹತ್ವದ ಸೇವಾ ವಿಸ್ತರಣೆಯನ್ನು ಘೋಷಿಸಲಾಯಿತು.
‘ಶೇಪಿಂಗ್ ದ ಫ್ಯೂಚರ್ ಆಫ್ ಎಸ್ಥೆಟಿಕ್ಸ್ ಆ್ಯಂಡ್ ಪ್ಲಾಸ್ಟಿಕ್ ಸರ್ಜರಿ’ (ಎಸ್ಥೆಟಿಕ್ಸ್ ಮತ್ತು ಪ್ಲಾಸ್ಟಿಕ್ ಸರ್ಜರಿಯ ಭವಿಷ್ಯ ರೂಪಿಸುವುದು) ಎಂಬ ವಿಷಯದಡಿ ನಡೆದ ಸಮ್ಮೇಳನದಲ್ಲಿ ಫೆಡರಲ್ ನ್ಯಾಷನಲ್ ಕೌನ್ಸಿಲ್ ಸದಸ್ಯೆ ಗೌರವಾನ್ವಿತ ಆಯಿಷಾ ಇಬ್ರಾಹಿಂ ಅಲ್ ಮಾರಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು. ಈ ಸಂದರ್ಭದಲ್ಲಿ ಅವರು ಸಂಸ್ಥೆಯ ಎರಡು ನೂತನ ಸೇವೆಗಳನ್ನು ಉದ್ಘಾಟಿಸಿದರು. ಅತ್ಯಾಧುನಿಕ ತಂತ್ರಜ್ಞಾನದ ಲೇಸರ್ ಮತ್ತು ಸುಧಾರಿತ ಎಸ್ಥೆಟಿಕ್ ಚಿಕಿತ್ಸಾ ಸೌಲಭ್ಯಗಳು ಹಾಗೂ ಸಂಸ್ಥೆಯ ಸ್ವಂತ ತ್ವಚೆ ಆರೈಕೆ ಉತ್ಪನ್ನಗಳ ಸರಣಿಯಾದ ‘ಟಿಐಎ ಲಕ್ಸುರಿ ಸ್ಕಿನ್ ಕಲೆಕ್ಷನ್’ ಅನ್ನು ಅಧಿಕೃತವಾಗಿ ಬಿಡುಗಡೆಗೊಳಿಸಿದರು.
ಸಮ್ಮೇಳನದ ವೈಜ್ಞಾನಿಕ ಕಾರ್ಯಕ್ರಮಕ್ಕೆ 7.5 ಸಿಎಮ್ಇ ಗಂಟೆಗಳ ಮಾನ್ಯತೆ ದೊರೆತಿತ್ತು. ಯುಎಇ ಸೇರಿದಂತೆ ವಿವಿಧ ದೇಶಗಳ ಪ್ಲಾಸ್ಟಿಕ್ ಸರ್ಜನ್‌ಗಳು, ಚರ್ಮರೋಗ ತಜ್ಞರು ಹಾಗೂ ಎಸ್ಥೆಟಿಕ್ ಚಿಕಿತ್ಸಾ ಪರಿಣತರು ಇದರಲ್ಲಿ ಭಾಗವಹಿಸಿದ್ದರು. ವಯೋಸಹಜ ಮುಖದ ಬದಲಾವಣೆಗಳು, ಮುಖದ ಅಂಗರಚನೆ, ಫಿಲ್ಲರ್ ಚಿಕಿತ್ಸೆ, ಬೊಟುಲಿನಮ್ ಟಾಕ್ಸಿನ್, ಜೆ-ಪ್ಲಾಸ್ಮಾ, ಪೆಪ್ಟೈಡ್‌ಗಳು ಮತ್ತು ಲೇಸರ್ ಚಿಕಿತ್ಸೆಗಳ ಕುರಿತು ತಜ್ಞರು ವಿಚಾರ ಮಂಡಿಸಿದರು. ಆಧುನಿಕ ಸೌಂದರ್ಯವರ್ಧಕ ಚಿಕಿತ್ಸಾ ಕ್ಷೇತ್ರದಲ್ಲಿನ ನೂತನ ಬೆಳವಣಿಗೆಗಳು, ಚಿಕಿತ್ಸಾ ವಿಧಾನಗಳು ಹಾಗೂ ತಾಂತ್ರಿಕ ಪ್ರಗತಿಗಳ ಕುರಿತು ಚರ್ಚೆಗಳು ನಡೆದವು. ಕಾರ್ಯಕ್ರಮದ ಅಂತ್ಯದಲ್ಲಿ ಎಸ್ಥೆಟಿಕ್ಸ್ ಮತ್ತು ಪ್ಲಾಸ್ಟಿಕ್ ಸರ್ಜರಿ ಕ್ಷೇತ್ರಕ್ಕೆ ಮಹತ್ವದ ಕೊಡುಗೆ ನೀಡಿದ 21 ವೃತ್ತಿಪರರನ್ನು ಗೌರವಿಸಲಾಯಿತು.
2024ರ ಕೊನೆಯಲ್ಲಿ ಕಾರ್ಯಾರಂಭಿಸಿದ ತುಂಬೆ ಇನ್‌ಸ್ಟಿಟ್ಯೂಟ್ ಆಫ್ ಎಸ್ಥೆಟಿಕ್ಸ್ ಈವರೆಗೆ 75,000ಕ್ಕೂ ಅಧಿಕ ಗ್ರಾಹಕರಿಗೆ ವಿವಿಧ ಚಿಕಿತ್ಸಾ ಸೇವೆಗಳನ್ನು ಒದಗಿಸಿದೆ. ಈ ವರ್ಷ ಸಂಸ್ಥೆಯು ತನ್ನ ಸೇವೆಗಳನ್ನು ಫುಜೈರಾದ ತುಂಬೆ ಆಸ್ಪತ್ರೆಗೂ ವಿಸ್ತರಿಸಿದೆ. ಇದರೊಂದಿಗೆ ‘ಟಿಐಎ ವೆಲ್‌ನೆಸ್ ಆ್ಯಂಡ್ ಬ್ಯೂಟಿ ಸ್ಟೋರ್’ ಆರಂಭಿಸಿದ್ದು, ಆರೋಗ್ಯ ಮತ್ತು ಸೌಂದರ್ಯ ಆರೈಕೆಗೆ ಪೂರಕವಾಗಿ ‘ಬ್ಲೆಂಡ್ಸ್ ಆ್ಯಂಡ್ ಬ್ರೂಸ್ ನ್ಯೂಟ್ರಿಷ್’ ಎಂಬ ವೆಲ್‌ನೆಸ್ ಕೆಫೆಯನ್ನೂ ಪರಿಚಯಿಸಿದೆ.
ವೃತ್ತಿಪರ ಶಿಕ್ಷಣ ಮತ್ತು ತರಬೇತಿ ಕ್ಷೇತ್ರದಲ್ಲಿಯೂ ಸಂಸ್ಥೆ ಮಹತ್ವದ ಹೆಜ್ಜೆಯಿಟ್ಟಿದೆ. ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿಯ ಸಹಯೋಗದಲ್ಲಿ ಎಸ್ಥೆಟಿಕ್ ಚಿಕಿತ್ಸಾ ಕ್ಷೇತ್ರದ ವೃತ್ತಿಪರರಿಗಾಗಿ 20ಕ್ಕೂ ಅಧಿಕ ಪ್ರಮಾಣಪತ್ರ ಕೋರ್ಸ್‌ಗಳನ್ನು ನೀಡುತ್ತಿದೆ. ಈ ಮೂಲಕ ಸೌಂದರ್ಯವರ್ಧಕ ವೈದ್ಯಕೀಯ ಕ್ಷೇತ್ರದಲ್ಲಿ ಪರಿಣತ ಮಾನವ ಸಂಪನ್ಮೂಲವನ್ನು ರೂಪಿಸುವ ಉದ್ದೇಶ ಹೊಂದಿದೆ.
ಸಂಸ್ಥೆಯ ಮುಂದಿನ ಹಂತದ ವಿಸ್ತರಣಾ ಯೋಜನೆಗಳೂ ಸಿದ್ಧವಾಗಿವೆ. ಪುನರುತ್ಪಾದಕ ವೈದ್ಯಕೀಯ ಚಿಕಿತ್ಸೆ (ರೆಜೆನೆರೇಟಿವ್ ಮೆಡಿಸಿನ್) ಮತ್ತು ಐವಿ ಥೆರಪಿ ಸೌಲಭ್ಯಗಳನ್ನು ಒಳಗೊಂಡ ‘ಲಾಂಗಿವಿಟಿ ಕ್ಲಿನಿಕ್’ ಆರಂಭಿಸಲು ಯೋಜಿಸಲಾಗಿದೆ. ಇದರ ಜೊತೆಗೆ ಕೂದಲು ಉದುರುವಿಕೆ ಸಮಸ್ಯೆಗಳಿಗೆ ಆಧುನಿಕ ಚಿಕಿತ್ಸೆ ಒದಗಿಸುವ ‘ಹೇರ್ ರಿಸ್ಟೋರೇಶನ್ ಕ್ಲಿನಿಕ್’ ಸ್ಥಾಪನೆಯೂ ಉದ್ದೇಶಿತವಾಗಿದೆ. ಅಲ್ಲದೆ, ದುಬೈನಲ್ಲಿ ನಿರ್ಮಾಣಗೊಳ್ಳಲಿರುವ ನೂತನ ತುಂಬೆ ಮೆಡಿಸಿಟಿಯಲ್ಲಿ ಪ್ರಮುಖ ಮಟ್ಟದ ಎಸ್ಥೆಟಿಕ್ಸ್ ಸಂಸ್ಥೆಯನ್ನು ಆರಂಭಿಸಲು ಯೋಜನೆ ರೂಪಿಸಲಾಗಿದೆ.
“ವಿಶ್ವವಿದ್ಯಾಲಯ ಆಸ್ಪತ್ರೆಯ ಮೂಲಕ ದೊರೆಯುವ ವಿಶ್ವಾಸಾರ್ಹ ಮತ್ತು ಗುಣಮಟ್ಟದ ವೈದ್ಯಕೀಯ ಸೇವೆಯ ಮೇಲಿನ ನಂಬಿಕೆಯಿಂದ ರೋಗಿಗಳು ತುಂಬೆ ಇನ್‌ಸ್ಟಿಟ್ಯೂಟ್ ಆಫ್ ಎಸ್ಥೆಟಿಕ್ಸ್‌ಗೆ ಬರುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಲಾಂಗಿವಿಟಿ ಮತ್ತು ಕೂದಲು ಪುನಃಸ್ಥಾಪನಾ ಚಿಕಿತ್ಸೆಗಳ ಸೇವೆಗಳನ್ನು ವಿಸ್ತರಿಸುವುದರ ಜೊತೆಗೆ ದುಬೈನಲ್ಲಿಯೂ ಸಂಸ್ಥೆಯ ಉಪಸ್ಥಿತಿಯನ್ನು ಸ್ಥಾಪಿಸುವ ಯೋಜನೆ ಹೊಂದಿದ್ದೇವೆ” ಎಂದು ತುಂಬೆ ಗ್ರೂಪ್‌ನ ಆರೋಗ್ಯ ವಿಭಾಗದ ಉಪಾಧ್ಯಕ್ಷ ಅಕ್ಬರ್ ಮೊಯ್ದೀನ್ ತುಂಬೆ ತಿಳಿಸಿದರು.
ತುಂಬೆ ಇನ್‌ಸ್ಟಿಟ್ಯೂಟ್ ಆಫ್ ಎಸ್ಥೆಟಿಕ್ಸ್, ಅಜ್ಮಾನ್‌ನ ತುಂಬೆ ಮೆಡಿಸಿಟಿಯಲ್ಲಿರುವ ತುಂಬೆ ಯೂನಿವರ್ಸಿಟಿ ಹಾಸ್ಪಿಟಲ್‌ನ ಭಾಗವಾಗಿದೆ. ತುಂಬೆ ಗ್ರೂಪ್‌ನ ಆರೋಗ್ಯ ವಿಭಾಗವಾದ ತುಂಬೆ ಹೆಲ್ತ್‌ಕೇರ್‌ನಡಿ ಕಾರ್ಯನಿರ್ವಹಿಸುತ್ತಿರುವ ಈ ಸಂಸ್ಥೆಯು ಪ್ಲಾಸ್ಟಿಕ್ ಸರ್ಜರಿ, ಚರ್ಮರೋಗ ಚಿಕಿತ್ಸೆ, ಲೇಸರ್ ಚಿಕಿತ್ಸೆ ಹಾಗೂ ವಿವಿಧ ಸೌಂದರ್ಯವರ್ಧಕ ವೈದ್ಯಕೀಯ ಸೇವೆಗಳನ್ನು ಒದಗಿಸುತ್ತಿದೆ. ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ ಸಹಯೋಗದಲ್ಲಿ ವೃತ್ತಿಪರ ತರಬೇತಿ ಕಾರ್ಯಕ್ರಮಗಳನ್ನೂ ನಡೆಸುತ್ತಿದೆ.
ಹೆಚ್ಚಿನ ಮಾಹಿತಿಗಾಗಿ www.thumbayhealthcare.com ಸಂಪರ್ಕಿಸಬಹುದು.
