ಮಂಜೇಶ್ವರ: ಕೇರಳ ರಾಜಕೀಯದ ಅತ್ಯಂತ ಕುತೂಹಲಕಾರಿ ಕೇಂದ್ರಬಿಂದುವಾಗಿರುವ ಮಂಜೇಶ್ವರ ವಿಧಾನಸಭಾ ಕ್ಷೇತ್ರದಲ್ಲಿ ಈ ಬಾರಿ ಹೈಡ್ರಾಮಾ ಶುರುವಾಗಿದೆ. ಇಲ್ಲಿಯವರೆಗೆ ಅಬ್ಬರಿಸಿದ್ದ ಎಸ್.ಡಿ.ಪಿ.ಐ, ಈಗ ಅಂತಿಮ ಕ್ಷಣದಲ್ಲಿ ಸ್ಪರ್ಧೆಯಿಂದ ಹಿಂದೆ ಸರಿಯುವ ಮುನ್ಸೂಚನೆ ನೀಡುವ ಮೂಲಕ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ.
ಮಂಜೇಶ್ವರದಲ್ಲಿ ಬಿಜೆಪಿ ಮತ್ತು ಯುಡಿಎಫ್ ನಡುವೆ ನೇರ ಹಾಗೂ ಜಿದ್ದಾಜಿದ್ದಿನ ಪೈಪೋಟಿ ಇದೆ. ಇಂತಹ ಸಂದರ್ಭದಲ್ಲಿ ಎಸ್.ಡಿ.ಪಿ.ಐ ಸ್ಪರ್ಧಿಸುವುದರಿಂದ ಮತಗಳು ವಿಭಜನೆಯಾಗಿ ಬಿಜೆಪಿಗೆ ಲಾಭವಾಗಬಹುದು ಎಂಬ ಆತಂಕ ಸೃಷ್ಟಿಯಾಗಿದೆ.
ಇದೇ ಕಾರಣಕ್ಕೆ ಕಣ್ಣೂರಿನಲ್ಲಿ ನಡೆದ ತುರ್ತು ಸಮಾಲೋಚನಾ ಸಭೆಯ ಬೆನ್ನಲ್ಲೇ, ಅಭ್ಯರ್ಥಿ ಆಯ್ಕೆಯ ಕುರಿತು ಪುನರಾಲೋಚನೆ ನಡೆಸುವುದಾಗಿ ಪಕ್ಷದ ರಾಜ್ಯಾಧ್ಯಕ್ಷ ಸಿ.ಪಿ. ಎ ಲತೀಫ್ ಘೋಷಿಸಿದ್ದಾರೆ. ಇದು ಕೇವಲ ರಣತಂತ್ರವೋ ಅಥವಾ ಬಿಜೆಪಿಯ ಗೆಲುವಿನ ಭೀತಿಯಿಂದ ಕೈಗೊಂಡ ನಿರ್ಧಾರವೋ ಎಂಬ ಚರ್ಚೆ ಈಗ ಕೇರಳಾದ್ಯಂತ ಶುರುವಾಗಿದೆ.
ಇನ್ನೊಂದೆಡೆ, ಎಸ್.ಡಿ.ಪಿ.ಐ ನಡೆಯನ್ನು ಯುಡಿಎಫ್ ನಾಯಕರು ಲಘುವಾಗಿ ಪರಿಗಣಿಸಿದ್ದಾರೆ. “ಕಳೆದ ಸ್ಥಳೀಯ ಸಂಸ್ಥೆಗಳ ಚುನಾವಣೆಯಲ್ಲಿ ನಮ್ಮ ವಿರುದ್ಧ ಸ್ಪರ್ಧಿಸಿದರೂ ನಮಗೇನು ಹಾನಿಯಾಗಿಲ್ಲ, ಬದಲಾಗಿ ಎಂಟು ಪಂಚಾಯತ್ಗಳಲ್ಲಿ ಯುಡಿಎಫ್ ಇತಿಹಾಸದಲ್ಲೇ ಮೊದಲ ಬಾರಿಗೆ ಅಧಿಕಾರ ಹಿಡಿದಿದೆ” ಎಂದು ತಿರುಗೇಟು ನೀಡಿದ್ದಾರೆ. ಎಸ್.ಡಿ.ಪಿ.ಐ ಸ್ಪರ್ಧೆಯಿಂದ ಹಿಂದೆ ಸರಿಯುವ ನಾಟಕವಾಡುವುದಕ್ಕಿಂತ ಕಣಕ್ಕಿಳಿದು ತನ್ನ ರಾಜಕೀಯ ಭವಿಷ್ಯವನ್ನು ತಾನೇ ನಿರ್ಧರಿಸಲಿ ಎಂಬುದು ಯುಡಿಎಫ್ ನಾಯಕರ ಖಡಕ್ ನಿಲುವಾಗಿದೆ.
ಒಟ್ಟಿನಲ್ಲಿ, ಮಂಜೇಶ್ವರದ ಈ ರಾಜಕೀಯ ಮೇಲಾಟದಲ್ಲಿ ಎಸ್.ಡಿ.ಪಿ.ಐ ತೆಗೆದುಕೊಳ್ಳುವ ಅಂತಿಮ ನಿರ್ಧಾರವು ಆ ಪಕ್ಷದ ಅಸ್ತಿತ್ವದ ಮೇಲೆ ಮಾತ್ರವಲ್ಲದೆ, ಇಡೀ ಕ್ಷೇತ್ರದ ಫಲಿತಾಂಶದ ಮೇಲೆ ದೊಡ್ಡ ಪರಿಣಾಮ ಬೀರಲಿದೆ ಎಂಬುದು ಸ್ಪಷ್ಟ.
