ಕುಂಬಳೆ: ಕುಂಬಳೆಯಲ್ಲಿ ಖಾಸಗಿ ಬಸ್ ಸಿಬ್ಬಂದಿ ಹಾಗೂ ಮರ್ಚೆಂಟ್ ಯೂತ್ ವಿಂಗ್ ಕಾರ್ಯಕರ್ತರ ನಡುವೆ ಟ್ರಾಫಿಕ್ ಪರಿಷ್ಕರಣೆ ವಿಚಾರವಾಗಿ ಉದ್ವಿಗ್ನತೆ ಉಂಟಾದ ಬೆನ್ನಲ್ಲೇ, ಮರ್ಚೆಂಟ್ ಯೂತ್ ವಿಂಗ್ ನಾಯಕರು ಹೊಸ ತಂತ್ರದೊಂದಿಗೆ ಮುಂದಾಗಿದ್ದಾರೆ.
ರಾಜ್ಯದಲ್ಲಿ ಯುಡಿಎಫ್ ಆಡಳಿತಕ್ಕೆ ಬರಲಿದೆ ಎಂದು ಎಕ್ಸಿಟ್ ಪೋಲ್ಗಳು ಸೂಚಿಸುತ್ತಿರುವ ಸಂದರ್ಭದಲ್ಲಿ, ಯುಡಿಎಫ್ ಚುನಾವಣಾ ಭರವಸೆಗಳಲ್ಲಿ ಒಂದಾದ ಕೆಎಸ್ಆರ್ಟಿಸಿ ಬಸ್ಸುಗಳಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ ಸೌಲಭ್ಯವನ್ನು ಗಮನದಲ್ಲಿಟ್ಟು, ಹೆಚ್ಚು ಮಹಿಳಾ ಪ್ರಯಾಣಿಕರಿರುವ ಕುಂಬಳೆ–ಸೀತಾಂಗೋಳಿ–ಬದಿಯಡ್ಕ–ಪೆರ್ಲ–ಮುಳ್ಳೇರಿಯಾ ಮಾರ್ಗಗಳಲ್ಲಿ ಕೆಎಸ್ಆರ್ಟಿಸಿ ಬಸ್ ಸೇವೆ ಆರಂಭಿಸಬೇಕು ಎಂದು ಆಗ್ರಹಿಸಿ ಮರ್ಚೆಂಟ್ ಯೂತ್ ವಿಂಗ್ ಪದಾಧಿಕಾರಿಗಳು ಕುಂಬಳೆ ಗ್ರಾಮ ಪಂಚಾಯತ್ ಅಧ್ಯಕ್ಷ ವಿ.ಪಿ. ಅಬ್ದುಲ್ ಖಾದರ್ ಹಾಜಿಗೆ ಮನವಿ ಸಲ್ಲಿಸಿದರು.
ಈ ಮಾರ್ಗದಲ್ಲಿ ಸಂಚರಿಸುವ ಖಾಸಗಿ ಬಸ್ಸುಗಳು ಕುಂಬಳೆ ನಗರ ಮಧ್ಯಭಾಗದಲ್ಲಿ ನಿಲ್ಲಿಸಿ ಪ್ರಯಾಣಿಕರನ್ನು ಏರಿಸಲು ಅಥವಾ ಇಳಿಸಲು ಸಿದ್ಧರಾಗದ ಪರಿಸ್ಥಿತಿ ಇರುವ ಹಿನ್ನೆಲೆ, ಮರ್ಚೆಂಟ್ ಯೂತ್ ವಿಂಗ್ ಈ ಕ್ರಮಕ್ಕೆ ಮುಂದಾಗಿದೆ ಎಂಬುದು ಗಮನಾರ್ಹವಾಗಿದೆ.
ಮರ್ಚೆಂಟ್ ಯೂತ್ ವಿಂಗ್ ಪದಾಧಿಕಾರಿಗಳಾದ ಅಶ್ರಫ್ ಕೆ.ಎಂ. ಸ್ಕೈಲರ್, ಹೈದರ್ ಅಲಿ ಎ. ಹಾಗೂ ಅಬೂಬಕ್ಕರ್ ಸಿದ್ದೀಖ್ ಮನವಿ ಸಲ್ಲಿಸಿದರು.
