ಆಟಿಡ್ ಬರ್ಪೆನ…… ಆಟಿ ಕಳಂಜೆ

ತುಳುವನಾಡು ಪನ್ನಗ ಪ್ರಪಂಚಡ್ ಒಲ್ಪಲಾ ತಿಕ್ಕಂದಿನಂಚಿನ ಜನಪದ ಸಂಪ್ರದಾಯ,ಸಂಸ್ಕೃತಿ ಆಚರಣೆಲು, ಆಚಾರವಿಚಾರ,ಕಟ್ಟ್ ಪಾಡ್ ತೂವರೆ ತಿಕ್ಕುಂಡು. ಆಂಡ ಈ ಆಚರಣೆದ ಮೂಲನಂಬಿಕೆಲು ಇನಿತ ಕಾಲಘಟ್ಟಡ್ ಮುಂದುವರಿನ ತಂತ್ರಜ್ಞಾನ ಗ್ ವಿಸ್ಮಯ ಪಂದ್ ಪನೋಲಿ ಇಜ್ಜಾಂಡ ಉಂದೆ ಸತ್ಯ ಪಂದುಲಾ ಪನೋಲಿ. ವಿಜ್ಞಾನಗ್ ಸವಾಲ್ ಆದ್ ಉಂತುದಿನ ಪಂದುಲಾ ಪನೋಲಿ. ಪಂಡ ಕಾಟ್ ಕಲ್ಲ್ ಡ್ ತುಳುವೆರ್ ಸತ್ಯ ಪಂಡ್ ದ್ ದೈವ,ಭೂತ ಪನ್ಪಿನಂಚಿನ ಕೆಲವೊಂಜಿ ಪುದರ್ ಪನೊಂದು ಕಾಡ ಪುರ್ಪ ತೊಡ ನೀರ್ ಡ್ ಸತ್ಯನ್ ತೂಯಿನಕ್ ಲ್ . ತುಳುವೆರೆಗ್ ದೇವೆರೆರ್ದ್ ಮಿತ್ತ್ ದೈವೊಲು ಪಂದೆ ಕೆಲವೆರ್ ವಾದ ದೇವೆರೆನ ದೂತೆರ್, ದೇವೆರೆನ ಸೃಷ್ಟಿಯೇ ದೈವೊಲು ಪನ್ಪಿನಂಚಿನವು ನನ ಕೆಲವೆರೆನ ವಾದ. ಅಂಚೆನೆ ನನ ಕೆಲವೆರ್ ಭೂಮಿ ಉಂಡನಗ ಬೆರ್ಮೆರೆ ಸೃಷ್ಟಿ ಆಂಡ್ ಪನ್ಪೆರ್ . ಈ ಬೆರ್ಮೆರೆ ಸೃಷ್ಟಿ ಡ್ ಪುಟ್ಟುಪುರಾಪ್ ಗ್ ಬತ್ತಿನ ಕಳಂಜನ ಬಗ್ಗೆ ತೆರಿಯೊನುಗ . ಕಲಂಜನ ಪಾಡ್ದನದ ತುಳಿಪುನ್ ತೂನಗ ಪಿರಾಕ್ದ್ ಕಾಲಡ್ ರೋಗ ರುಜೀನ ಮಾರಿ ಸಿಕ್ ಮಾತ ಆಟಿ ಡ್ ಬುಡಾಂದೆ ಬರ್ಪುನ ಮಾರಿ ಬರ್ಸಗ್ಂದ್ ಪನ್ಪೆರ್ .ಅಂಚಾದ್ ಆಟಿ ಡ್ ಬತ್ತಿನ ಮಹಾಮಾರಿನ್ ಕಳೆಯೆರ್ ಆಟಿಡ್ ಉದಿತ್ತೆ ಕಳಂಜೆ ಪಂಡ್ದ್ ಕಳಂಜನ ಸಂದಿಡ್ ತೆರಿದ್ ಬರ್ಪುಂಡು ಮಾಯೊಡು ಜನನ ಗ್ ಬತ್ತೆದಾಂಡ ಮಾಯಂತ ಅರಸು ಮಗೆ ,ಜೊಗಡ್ ಜನನ ಗ್ ಬತ್ತೆದಾಂಡ ಜೊಗದರಸು ಮಗೆ , ಪಂಡ್ ದ್ ಅರಸು ಗಾಂಭೀರ್ಯ ನ್ ಬಿಂಬಿಸವೊಂದು ಬೆರ್ಮೆರೆ ದೃಷ್ಟಿ ಡ್ ಜನನಗ್ ಬತ್ತೆ ಅಪ್ಪೆ ಅಮ್ಮೆಲ ಬೆರ್ಮೆರ್ ಪಂಡ್ದ್ ತೆರಿದ್ ಬರ್ಪುಂಡ್ ಅಂಚಾದ್ ಈ ಭೂಮಿ ಬೆರ್ಮೆರೆ ಸೃಷ್ಟಿಂದ್ ಪನೊಲಿ ತುಳುವ ಮಣ್ಣ್ ದ ಸಾರಮಾನಿ ದೈವೊಲೇನ ಪುಟ್ಟುನ್ ನಾಡೊಂದು ಪೊಂಡ ನಾಗಮೂಲದ ಪರಿಕಲ್ಪನೆ ತಿಕ್ಕುಂಡು . ಬೆರ್ಮೆರ್ ದೃಷ್ಟಿ ಡ್ ಮಾರಿಕಳೆಯೆರೆ ಅರಸುಮಗೆಯಾದ್ ಆಟಿಡ್ ಕಳಂಜೆ ಜನನಗ್ ಬತ್ತೆ ಸೊಣಡ್ ಬಲತ್ತೆ ಪಂಡ್ ದ್ ಕಳಂಜನ ಸಂದಿ ಸಾರುಂಡು

ಯುವಜನತೆ ಅಧುನಿಕತೆಟ್ ತೆಲೆಂದುಪ್ಪುನ ಈ ಪೊರ್ತುಡು ನಮ್ಮ ತುಳುವನಾಡ್ ದ ಪಿರಾಕ್ ದ ಸಂಪ್ರದಾಯದ ಜನಪದ ಕಲೆ ಆಟಿ ಕಲಂಜನ್ ತುಳುನಾಡ್ ದ ಕೇಲವೊಂಜಿ ಗ್ರಾಮಡ್ ಇನಿಕ್ಲ ದೈವ ಕಲಾವಿದೆರ್ ಅಕ್ಲೆನ ಜೊಕ್ಲೆಡ ರಂಗ್ ಪಾಡ್ಪೊವೊಂದು ಬರುಪುನವು ಎಡ್ಡೆ ವಿಚಾರ. ಹಿರಿಜೀವದ ಪಾತೆರದಲೇಕ್ಕ ಇಲ್ಲ ಜಾಲ್ ಗ್ ಕಾರ್ ದಿವಾರಾವಂದಿನ ಬರ್ಸ ಆಟಿ ತಿಂಗೊಳುಡು ಬರೊದುಪ್ಪಂಡು ಪಿದಾಯಿ ಪೊವದನಂಚಿನ ಕಷ್ಟದ ಪೊರ್ತುಡು ಪೂರ್ವ ತಯಾರಿ ಮಲ್ತೊಂದು ಆನಿದ ಕಾಲದ ಜನಮಾನಿಲು ಇಲ್ಲದ ಅಟ್ಟೊಲಿಗೆಡ್ ಅಟಿಲ್ ಗ್ ಬೊಡಾಪಿನ ವಸ್ತುಲೇನ್ , ಸಾಂತನಿ , ಕೆರೆಂಗ್ ದ ಅಪ್ಪಲ ಮಾತ ಸಂಪೊಲ್ತ್ ದ್ ದಿವೊದಿತ್ತೆರ್ ಅಂಚನೆ ಕೇಲವು ಇಲ್ಲಡ್ ಕಳಂಜಗ್ ಬೊಡ ದ್ ದವಸ ದಾನ್ಯ ಪ್ರತ್ಯೇಕ ದಿವೊಂತೆರ್ .

ಪಿರಾಕ್ ದ ಕಾಲಡ್ ಪೊರ್ತು ಬುಡಾಂದೆ ಬರ್ಪುನ ಬರ್ಸಗ್ ಮಹಾ ಮಾರಿ ರೋಗ ಬರೊಂದಿತ್ತ್ಂಡ್ ಊರುಗ್ ಬತ್ತಿನ ಮಹಾಮಾರಿನ್ ಕಳೆಯೆರೆ ಆಟಿಡ್ ಬೇರ್ಮೆರ್ ಕಳಂಜೆನ್ ಸೃಷ್ಟಿ ಮಲ್ತೆರ್. ಅಂಚಾದ್ ಕಳಂಜನ ಪುಟ್ಟುಪುರಾಪ್ ದೈವ ಗಣಂದ್ ಪನೊಲಿ ದೈವಕಲಾವಿದೆರ್ನ ಜೊಕುಲು ಸಾದರಣವಾದ್ ಕಟ್ಟ್ ಮುಡಿಪುವೆರ್ ದುಂಬುದ ಕಾಲಡ್ ಮೊನೆಗ್ ಬೊಲ್ದು ಚೇಡಿ ಬುಕ್ಕ ಮಿಸೆ ಗಡ್ಡಗ್ ಕೆಂಪು ಕಲ್ಲನ್ ತರೆತ್ತ್ ದ್ ಪುಜೊಂದು ಬೊಲ್ದು ರಂಗ್ ಡ್ ಕೆಸರಿಗಡ್ಡ(ಕೆಸರಿಗಡ್ಡ ಗ್ ಕಲ್ಲಿ ದೈತ್ಯ ಪೂ ನ್ ಉಪಯೊಗ ಮಲ್ಪುವೆರ್) ಪಂಡ್ ದ್ ಹಿರಿಯ ಕಲಾವಿದೆರ್ ಟಿವಿಮಾದ್ಯಮದ ಭೂತಾರಾಧನೆ ಲೇಸ್ ಡ್ ತೆರಿಪಾಯೆರ್ ಉಂದು ಪ್ರಕೃತಿ ಆರಾದನೆನ್ ತೊಜುಪಾವುಂಡು ಇತ್ತೆ ಮಂಜಲ್ ಅರದಲ , ತುಟಿಕ್ ಇಂಗ್ಲಿಕದ ಪೊಡಿ , ಕಪ್ಪುದ ಮಿಸೆ ಗಡ್ಡ , ತರೆಕ್ ಪೂತಾ ದಂಡೆ, ತೀರಿತ ಕೀರಿಟ,ತಲೆ ಮಣಿ, ಕಾರ್ ಗ್ ಗೆಜ್ಜೆ, ಕೈಕ್ ಪುಂಡೆವು, ತಾರಿ ಪೊನ್ನೆ ಪನೊಲಿ ಮರತ ಒಲಿಟ್ ಬೆದುರುದ ಪದಿನಾಜಿ ಕೊಲು ಉಪಯೊಗ ಮಲ್ತೊಂದು ಛತ್ರ (ಕೊಡೆತಲೇಕ್ಕ)ಮಲ್ಪುವೆರ್ ಸೊಂಟಗ್ ತಿರಿ ಕೇಪುಲ ಪೂ ಅಲಂಕಾರ ಮಲ್ತೊಂದು ದೇಬೆರೆ ನ್ ಸುಗಿತ್ ದ್ ಸುರುಕ್ ಗ್ರಾಮದ ಇಲ್ಲ್ (ಬೂಡು ಗುತ್ತು ಬಾರಿಕೆ) ಬರ್ಪುನ ಕ್ರಮ ಬುಕ್ಕ ಊರುಡ್ದ್ ಊರುಗ್ ಪದಿನಾಜಿ ದಿನತ ತಿರುಗಾಟ ಸುರು ಅಪುಂಡು ತೆನ್ಕಾಯಿ ಮರ್ಗಿಲ್ಡ್ ಬುಕ್ಕ ಬಡಕಾಯಿ ಮರ್ಗಿಲ್ಡ್ ವೇಷಭೂಷಣ ವ್ಯತ್ಯಾಸ ಉಪ್ಪುಂಡು ಪಿರಾಕ್ದ್ ಕಾಲಡ್ ಅಜಲ್ ಬುಡ್ದ್ ಪೊಯೆರಿಜ್ಜಿ ಇತ್ತೆ ಮಾತ ಕಡೆಲ ಸುತ್ತುವೆರ್ ಕಳಂಜನೊಟ್ಟುಗು ಒಂಜಿ ಸಹಾಯಕೆರಾದ್ ತೆಂಬೆರೆ ಪುಗೆಲ್ ಪಾಡ್ ದ್ ಉಪ್ಪು ವೇರ್ ಸಂದಿ ಪುರ ಪನ್ಪೆರ್ ಕಳಂಜಗ್ ಛತ್ರ ತಿರುಗಾವೊಂದು ನಲಿಪುನ ಮಾತ್ರ .

ಇಲ್ಲ ಜಾಲ್ ಗ್ ಬತ್ತಿದ್ ಕಳಂಜೆ ನಲುಪುನಗ ಸಂದಿ ಈ ರೀತಿ ಪನ್ಪೆರ್
ಕಲಂಜೆ ಕಲಂಜೆನಾ …..
ಕಲಂಜೆ ಎರೆ ಮಗೆನಾ…..
ಕಲಂಜೆ ಮಾಯೊಡು ಪುಟ್ಯೊಂಡೆ..
ಕಲಂಜೆ ಮಾಯಾಂತರಸು ಮಗೆನಾ..
ಕಲಂಜೆ ಜೊಗಡ್ ಪುಟ್ಯೊಂಡೆ.
ಕಲಂಜೆ ಜೊಗಂತರಸು ಮಗೆನಾ.
ಕಲಂಜೆ ಬೆರ್ಮೆರೆ ಸಾಪೊಡು ಪುಟ್ಯೊಂಡೆ..
ಕಲಂಜಗ್ ಅಮ್ಮೆ ಬೆರ್ಮೆರ್
ಕಲಂಜಗ್ ಅಪ್ಪೆ ಬೆರ್ಮೆರ್.
ಕಲಂಜೆ ಅಟಿಡ್ ಪುಟ್ಯೊಂಡೆ

ಕಲಂಜೆ ಸೊಣಡ್ ಬಲತೆನಾ.. ಇಂಚ ಕಲಂಜನ ಸಂಧಿ ಮುಂದುವರಿವುಂಡು ಅದಗ ಕಲಂಜನ ವೇಷ ದಾರಿ ನಲಿಪುನ ತೂಯೆರೆ ಬಾರಿ ಪೊರ್ಲು ಕೊಂಗಾಟಲ ಅಪುಂಡು ಪ್ರತಿ ಇಲ್ಲಡ್ ಅರಿ, ಪಣವು ,ತಾರಯಿ ,ಪುಲಿ, ಮುನ್ಚಿ ,ತಡ್ಪೆಡ್ ಪಾಡ್ದ್ ಕೊರ್ಪುನ ಕ್ರಮ ಅವತ್ತಂದೆ ನಿರ್ ಗ್ ಮಂಜಲ್ ಪೊಡಿ ಬೊನ್ನಿಯ ಪಾಡ್ ದ್ ಕಲಂಜಗ್ ಅರತಿ ಮಲ್ತ್ ದ್ ಸಾದಿಬಾಯಿಗ್ ಚೇಪುನ ಕ್ರಮ ಕೇಲವು ಕಡೆ ಉಂಡು ಉಂದು ಬತ್ತಿನ ಮಾರಿನ್ ಭೂಮಿಗ್ ತಾರ್ಪುನ ಪನ್ಪೆರ್ ಇಂಚ ಇಲ್ಲ್ ಇಲ್ಲಗ್ ಬತ್ತ್ ದ್ ಪೊಂಡ ಮನಸ್ಗೊಂಜಿ ದೈರ್ಯ ಸಂತೋಷ ಪಂಡ್ ದ್ ಹಿರಿಯಕ್ಲ್ ಪನೊಂದಿತ್ತೆರ್ ಅಂಚನೆ ಪೆತ್ತ ಕೈಕಂಜಿ, ಕಂಡ ಬುಳೆ,ತೊಟಗ್ ಬರ್ಪುನ ಮಾತ ಎರುಪೆರುಗ್ ಕಳಂಜೆ ತಡೆಯೊಡ್ಡುದ್ ಸಮೃದ್ಧಿ ಬರ್ಪುಂಡುದ್ ನಂಬಿಕೆ ಅಂಚನೆ ಎಲ್ಯ ಪ್ರಾಯೊಡು ರಂಗ್ ಪಾಡೊಂದು ಗೆಜ್ಜೆ ಕಟ್ಟೊಂದಿನ ಕಲಾವಿದೆರೆಗ್ ದುಂಬಗ್ ದೈವ ಚಾಕಿರಿಗ್ ಅಡಿಪಾಯ ಅಪುಂಡು. ಆಂಡಾ ಇತ್ತೆದ ಅಭಿವೃದ್ಧಿ, ರಾಜಕಿಯ ಶಿಕ್ಷಣ, ಬುಕ್ಕ ಉದ್ಯೋಗದ ಪುದರ್ ಡ್ ಬುಳೆ ಸೆಳೆ ನಾಶ ಮಲ್ತ್ ದ್ ಮಲ್ಲ ಕಟ್ಟಡ ನಿರ್ಮಾಣ ಮಲ್ಪುನ ಈ ಸಂದರ್ಭಡ್ ಪಿರಾಕ್ ದ ಸಂಪ್ರದಾಯ ಜನಪದ ಕಲೆನ್ ಯುವ ಪೀಳಿಗೆ ಗ್ ಪರಿಚಯ ಮಲ್ಪುನ ಹಿರಿಜೀವಲೇನ ಕೆಲಸ ಅಪಾರವಾಯಿನವು..

ಅಂಚನೆ ಪಿರಾಕ್ ದ ಕಾಲಡ್ ಇತ್ತಿನ ಮಹಾಮಾರಿ ಇತ್ತೆ ಇಜ್ಜತ್ತ? ನನ ದಾಯೆ ಈ ಸಂಪ್ರದಾಯ? ಪಂಡ್ ದ್ ಕೇಳೆವೇರ್ ಡ ಚಿಂತನೆಲ ಉಪ್ಪು. ಮುಂದುವರಿನ ತಂತ್ರಜ್ಞಾನ, ತಜ್ಞ ವೈದ್ಯರ್ ಉಪ್ಪುನಗ ಪಿರಾಕ್ ದ ಹಿರಿಯಕ್ಲೆನ ಪೂರ ನಂಬಿಕೆ ಸಂಪ್ರದಾಯ ಆಚಾರ, ಪದ್ದತಿ, ಒಂಜಿ ಮೂಡನಂಬಿಕೆ ಪನ್ಪುನೇಕ್ ಕರಿ ಸರಿ ಬತ್ತಿನ ಇಡಿ ಲೊಕಗ್ ವ್ಯಾಪಿಸಿನ ಕೊರೊಣ ಮಹಾಮಾರಿಯೇ ಸಾಕ್ಷಿ. ಎತ್ ತಂತ್ರಜ್ಞಾನ ಇತ್ತಿಂಡಲ ನಮ್ಮ ಪಿರಾಕ್ ದ ಸಂಪ್ರದಾಯದ ,ಕಟ್ಟ್ ಪಾಡ್, ಪುಲಮರ್ದ್, ದೃಷ್ಟಿ ದೆಪ್ಪುನೆ, ಇಂದೆಕ್ ಇತ್ತೆದ ವಾ ಮರ್ದ್ ಲ ಬೇದಿ ಅತ್ತ್ ಹಿರಿಯಕ್ಲೆನ ಪಿರಾಕ್ ದ ಪಾತೆರ ಪೊಟ್ಟಾತಿಜಿ ಪನೊಲಿ.ದೈವ ಕಲಾವಿದೆರ್ ನನಾತ್ ಆಟಿ ಕಲಂಜನ್ ಪ್ರತಿ ಗ್ರಾಮಡ್ ಪ್ರತಿ ಇಲ್ಲಗ್ ಬತ್ತ್ ದ್ ನನ ದುಂಬುಗ್ ಬರ್ಪುನ ಮಾಹಮಾರಿನ್ ದೂರ ಮಲ್ಪಡ್ ಸುಭಿಕ್ಷೆದ ದಿನ ನಮ್ಮ ಅವಡ್ . ಪಿರಾಕ್ ದ ಸಂಪ್ರದಾಯ ನ್ ಮಲ್ತೊಂದುಪ್ಪುನ ದೈವ ಕಲಾವಿದ ಬಂದುಲೇಗ್ ದೈವದೇಬೆರೆ ಆಶಿರ್ವಾದ ಇಪ್ಪಡ್ ಮಾತ ತುಳುವ ಬಂದುಲೇಗ್ ಆಟಿ ತಿಂಗೊಲುದ ಎಡ್ಡೆಪ್ಪುಲು.

✍️ ಬಾಲಕೃಷ್ಣ ವಿ ಯನ್