‘ಆಪರೇಷನ್ ವಿಜಯ್’ ಯಶಸ್ಸಿಗೆ ಯುವ ನಾಯಕತ್ವ, ಬೋಫೋರ್ಸ್ ಫಿರಂಗಿಗಳೇ ಪ್ರಮುಖ ಕಾರಣ: ಕರ್ನಲ್ ನಿಟ್ಟೆಗುತ್ತು ಶರತ್ ಭಂಡಾರಿ

ಮಂಗಳೂರು:ಕಾರ್ಗಿಲ್ ಯುದ್ಧವು ಭಾರತೀಯ ಸೇನೆಯ ಶೌರ್ಯ, ಯುವ ನಾಯಕತ್ವ ಹಾಗೂ ಅತ್ಯುತ್ತಮ ಯುದ್ಧತಂತ್ರಕ್ಕೆ ಸಾಕ್ಷಿಯಾದ ಸಮರವಾಗಿದ್ದು, ಯುವ ಅಧಿಕಾರಿಗಳ ಮುಂಚೂಣಿ ನಾಯಕತ್ವ ಮತ್ತು ಬೋಫೋರ್ಸ್ ಫಿರಂಗಿಗಳ ಪರಿಣಾಮಕಾರಿ ಬಳಕೆಯೇ ಭಾರತದ ವಿಜಯಕ್ಕೆ ಪ್ರಮುಖ ಕಾರಣವಾಗಿತ್ತು ಎಂದು ನಿವೃತ್ತ ಕರ್ನಲ್ ನಿಟ್ಟೆಗುತ್ತು ಶರತ್ ಭಂಡಾರಿ ಹೇಳಿದರು.

ನಗರದ ಪತ್ರಿಕಾಭವನದಲ್ಲಿ ದಕ್ಷಿಣ ಕನ್ನಡ ಜಿಲ್ಲಾ ಮಾಜಿ ಸೈನಿಕರ ಸಂಘ ಆಯೋಜಿಸಿದ್ದ ಪತ್ರಿಕಾಗೋಷ್ಠಿಯಲ್ಲಿ ಕಾರ್ಗಿಲ್ ಯುದ್ಧದ ಹಿನ್ನೆಲೆ ವಿವರಿಸಿದ ಅವರು, ಕಾರ್ಗಿಲ್ ಲಡಾಖ್‌ನಲ್ಲಿರುವ ಸುರು ನದಿಯ ತಟದಲ್ಲಿರುವ ಪಟ್ಟಣವಾಗಿದ್ದು, ಶ್ರೀನಗರ–ಲೇಹ್ ರಾಷ್ಟ್ರೀಯ ಹೆದ್ದಾರಿ (ಎನ್‌ಎಚ್–1ಎ) ಮಧ್ಯಭಾಗದಲ್ಲಿದೆ. ಕಾರ್ಗಿಲ್ ಪಟ್ಟಣದ ಉತ್ತರ ಭಾಗದ ಸುಮಾರು 16 ಸಾವಿರದಿಂದ 18 ಸಾವಿರ ಅಡಿ ಎತ್ತರದ ದುರ್ಗಮ ಪರ್ವತ ಪ್ರದೇಶದಲ್ಲಿಯೇ 1999ರ ಯುದ್ಧ ನಡೆದಿತ್ತು ಎಂದು ತಿಳಿಸಿದರು.

1984ರಲ್ಲಿ ಭಾರತೀಯ ಸೇನೆ ‘ಆಪರೇಷನ್ ಮೇಘದೂತ್’ ಮೂಲಕ ಈ ಎತ್ತರದ ಪ್ರದೇಶಗಳನ್ನು ತನ್ನ ನಿಯಂತ್ರಣಕ್ಕೆ ಪಡೆದು ಶಾಶ್ವತ ನೆಲೆಗಳನ್ನು ಸ್ಥಾಪಿಸಿತ್ತು. ಆದರೆ ತೀವ್ರ ಹಿಮಪಾತ ಮತ್ತು ಮೈನಸ್ 50 ಡಿಗ್ರಿಗೂ ಇಳಿಯುವ ಚಳಿಯಿಂದ ಚಳಿಗಾಲದಲ್ಲಿ ಯೋಧರು ತಾತ್ಕಾಲಿಕವಾಗಿ ಕೆಳಭಾಗಕ್ಕೆ ಸ್ಥಳಾಂತರಗೊಂಡು, ಬೇಸಿಗೆಯಲ್ಲಿ ಮತ್ತೆ ಬಂಕರ್‌ಗಳಿಗೆ ಮರಳುವ ಪದ್ಧತಿ ಇತ್ತು ಎಂದರು.

ಈ ಪರಿಸ್ಥಿತಿಯನ್ನು ದುರುಪಯೋಗಪಡಿಸಿಕೊಂಡ ಪಾಕಿಸ್ತಾನದ ಆಗಿನ ಸೇನಾ ಮುಖ್ಯಸ್ಥ ಜನರಲ್ ಪರ್ವೇಜ್ ಮುಷರಫ್, ‘ಆಪರೇಷನ್ ಬದ್ರ್’ ಹೆಸರಿನಲ್ಲಿ ಭಾರತದ ಖಾಲಿ ಬಂಕರ್‌ಗಳನ್ನು ಅತಿಕ್ರಮಿಸುವ ಸಂಚು ರೂಪಿಸಿದರು. ಶ್ರೀನಗರ–ಲೇಹ್ ಹೆದ್ದಾರಿಯನ್ನು ಕಡಿದು ಲೇಹ್ ಹಾಗೂ ಸಿಯಾಚಿನ್ ಪ್ರದೇಶವನ್ನು ಪ್ರತ್ಯೇಕಿಸುವುದು, ಭಯೋತ್ಪಾದಕರಿಗೆ ಪರ್ಯಾಯ ನುಸುಳು ದಾರಿ ಕಲ್ಪಿಸುವುದು ಹಾಗೂ ಕಾಶ್ಮೀರ ಸಮಸ್ಯೆಯನ್ನು ಮತ್ತೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರಸ್ತಾಪಕ್ಕೆ ತರುವುದು ಈ ಕಾರ್ಯಾಚರಣೆಯ ಉದ್ದೇಶವಾಗಿತ್ತು ಎಂದು ಹೇಳಿದರು.

ಮೇ 1999ರ ಮೊದಲ ವಾರದಲ್ಲಿ ಸ್ಥಳೀಯ ಕುರಿಗಾಹಿಯೊಬ್ಬ ಅನುಮಾನಾಸ್ಪದ ಚಟುವಟಿಕೆಗಳನ್ನು ಗಮನಿಸಿದ ಬಳಿಕ ಭಾರತೀಯ ಸೇನೆ ಕ್ಯಾಪ್ಟನ್ ಸೌರಭ್ ಕಾಲಿಯಾ ನೇತೃತ್ವದ ಗಸ್ತು ತಂಡವನ್ನು ಕಳುಹಿಸಿತು. ಪಾಕಿಸ್ತಾನಿ ಸೈನಿಕರು ಅವರನ್ನು ಬಂಧಿಸಿ ಅಮಾನವೀಯ ಚಿತ್ರಹಿಂಸೆ ನೀಡಿ ಹತ್ಯೆ ಮಾಡಿದರು. ಈ ಘಟನೆಯ ಬಳಿಕ ಪಾಕಿಸ್ತಾನದ ಅತಿಕ್ರಮಣದ ಪ್ರಮಾಣ ಬೆಳಕಿಗೆ ಬಂದಿದ್ದು, ಕೇಂದ್ರ ಸರ್ಕಾರದ ಭದ್ರತಾ ಸಮಿತಿಯು ಅವರನ್ನು ಹೊರಹಾಕಲು ನಿರ್ಧರಿಸಿತು ಎಂದು ವಿವರಿಸಿದರು.

ಭಾರತೀಯ ಸೇನೆ ‘ಆಪರೇಷನ್ ವಿಜಯ್’, ಭಾರತೀಯ ವಾಯುಪಡೆ ‘ಆಪರೇಷನ್ ಸಫೇದ್ ಸಾಗರ್’ ಹಾಗೂ ಭಾರತೀಯ ನೌಕಾಪಡೆ ‘ಆಪರೇಷನ್ ತಲ್ವಾರ್’ ಮೂಲಕ ಸಮನ್ವಯ ಕಾರ್ಯಾಚರಣೆ ನಡೆಸಿದವು. ನೌಕಾಪಡೆಯು ಕರಾಚಿ ಬಂದರು ಮಾರ್ಗಗಳನ್ನು ತಡೆದು ಪಾಕಿಸ್ತಾನಕ್ಕೆ ಯುದ್ಧ ಸಾಮಗ್ರಿ ತಲುಪದಂತೆ ಕ್ರಮ ಕೈಗೊಂಡಿತು ಎಂದು ಹೇಳಿದರು.

ಜುಲೈ 5, 1999ರಂದು ಅಮೆರಿಕದ ವಾಷಿಂಗ್ಟನ್‌ನಲ್ಲಿ ಪಾಕಿಸ್ತಾನದ ಪ್ರಧಾನಿ ನವಾಜ್ ಶರೀಫ್ ಮತ್ತು ಅಮೆರಿಕ ಅಧ್ಯಕ್ಷ ಬಿಲ್ ಕ್ಲಿಂಟನ್ ಜಂಟಿ ಹೇಳಿಕೆ ನೀಡಿದರೂ, ಪಾಕಿಸ್ತಾನಿ ಪಡೆಗಳು ಸಂಪೂರ್ಣ ಹಿಂತೆಗೆದುಕೊಳ್ಳಲಿಲ್ಲ. ಭಾರತೀಯ ಸೇನೆ ಮುಂದುವರಿದ ಕಾರ್ಯಾಚರಣೆಯಲ್ಲಿ ಅವರನ್ನು ಸಂಪೂರ್ಣವಾಗಿ ಹಿಮ್ಮೆಟ್ಟಿಸಿತು. ಕೊನೆಯ ಪಾಕಿಸ್ತಾನಿ ನೆಲೆಯನ್ನು ಜುಲೈ 26ರಂದು ವಶಪಡಿಸಿಕೊಂಡ ಹಿನ್ನೆಲೆಯಲ್ಲಿ ಆ ದಿನವನ್ನು ಕಾರ್ಗಿಲ್ ವಿಜಯ ದಿವಸವಾಗಿ ಆಚರಿಸಲಾಗುತ್ತಿದೆ ಎಂದರು.ಯುದ್ಧದಲ್ಲಿ ಭಾರತೀಯ ಸೇನೆಯ 526ಕ್ಕೂ ಹೆಚ್ಚು ಯೋಧರು ವೀರಮರಣ ಹೊಂದಿದ್ದು, ಅವರ ಶೌರ್ಯಕ್ಕೆ ನಾಲ್ಕು ಪರಮವೀರ ಚಕ್ರ, ಹಲವು ಮಹಾವೀರ ಚಕ್ರ ಹಾಗೂ 55 ವೀರ ಚಕ್ರ ಸೇರಿದಂತೆ ಅನೇಕ ಶೌರ್ಯ ಪ್ರಶಸ್ತಿಗಳನ್ನು ರಾಷ್ಟ್ರಪತಿಗಳು ಪ್ರದಾನಿಸಿದ್ದಾರೆ ಎಂದು ಹೇಳಿದರು.

ಯುದ್ಧದ ಎರಡು ಪ್ರಮುಖ ಅಂಶಗಳು

ಕಾರ್ಗಿಲ್ ಯುದ್ಧದ ಯಶಸ್ಸಿಗೆ ಎರಡು ಅಂಶಗಳು ನಿರ್ಣಾಯಕವಾಗಿದ್ದವು. ಮೊದಲನೆಯದು, ಲೆಫ್ಟಿನೆಂಟ್‌, ಕ್ಯಾಪ್ಟನ್ ಹಾಗೂ ಜೂನಿಯರ್ ಕಮಿಷನ್ಡ್ ಅಧಿಕಾರಿಗಳು ಮುಂಚೂಣಿಯಲ್ಲಿ ನಿಂತು ಯುದ್ಧವನ್ನು ಮುನ್ನಡೆಸಿದ ಯುವ ನಾಯಕತ್ವ. ಎರಡನೆಯದು, ಬೋಫೋರ್ಸ್ ಸೇರಿದಂತೆ ಸುಮಾರು 300 ಫಿರಂಗಿಗಳ ಬಳಕೆ. ಯುದ್ಧದಲ್ಲಿ ಸುಮಾರು 2.5 ಲಕ್ಷ ಶೆಲ್‌ಗಳನ್ನು ಹಾರಿಸಲಾಗಿದ್ದು, ಪಾಕಿಸ್ತಾನದ ಶೇ.80ರಷ್ಟು ಜೀವಹಾನಿ ಹಾಗೂ ಯುದ್ಧೋಪಕರಣಗಳ ನಾಶ ಫಿರಂಗಿ ದಾಳಿಯಿಂದಲೇ ಸಂಭವಿಸಿತ್ತು ಎಂದು ತಿಳಿಸಿದರು.

74 ದಿನಗಳ ಕಾಲ ನಡೆದ ಕಾರ್ಗಿಲ್ ಯುದ್ಧಕ್ಕೆ ಪ್ರತಿದಿನ ಸುಮಾರು ₹15 ಕೋಟಿ ವೆಚ್ಚವಾಗಿತ್ತು ಎಂದ ಅವರು, ಪಾಕಿಸ್ತಾನ ಅಧಿಕೃತವಾಗಿ 453 ಸೈನಿಕರು ಮೃತಪಟ್ಟಿದ್ದಾರೆ ಎಂದು ಹೇಳಿಕೊಂಡಿದ್ದರೂ, ನಂತರ ನವಾಜ್ ಶರೀಫ್ ಅವರೇ ಸಾವಿರಾರು ಪಾಕಿಸ್ತಾನಿ ಸೈನಿಕರು ಸಾವನ್ನಪ್ಪಿರುವುದಾಗಿ ಉಲ್ಲೇಖಿಸಿದ್ದರು ಎಂದು ಹೇಳಿದರು.

ಈ ಸಂದರ್ಭದಲ್ಲಿ ದಕ್ಷಿಣ ಕನ್ನಡ ಜಿಲ್ಲಾ ಮಾಜಿ ಸೈನಿಕರ ಸಂಘದ ಅಧ್ಯಕ್ಷ, ಭಾರತೀಯ ವಾಯುಪಡೆಯ ನಿವೃತ್ತ ಅಧಿಕಾರಿ (ಐಎಎಫ್) ವೆಟರನ್ ಶ್ರೀಕಾಂತ್ ಶೆಟ್ಟಿ , ಮಾಜಿ ಶಾಸಕ ಕ್ಯಾಪ್ಟನ್ ಗಣೇಶ್ ಕಾರ್ನಿಕ್, ದಕ್ಷಿಣ ಕನ್ನಡ ಜಿಲ್ಲಾ ಮಾಜಿ ಸೈನಿಕರ ಸಂಘದ ಪ್ರಧಾನ ಕಾರ್ಯದರ್ಶಿ ಕ್ಯಾಪ್ಟನ್ ದೀಪಕ್ ಅಡ್ಯಂತಾಯ, ನಿವೃತ್ತ ನೌಕಾಪಡೆಯ ವೆಟರನ್ ಸುಧೀರ್ ಪೈ ಹಾಗೂ ಸಂಘದ ಉಪಾಧ್ಯಕ್ಷ ಕರ್ನಲ್ ಎ.ಕೆ. ಜಯಚಂದ್ರನ್ ಉಪಸ್ಥಿತರಿದ್ದರು.

ವರದಿ : ಗಿರೀಶ್ ಪಿ . ಎಂ ಕಾಸರಗೋಡು