ಅಜ್ಮಾನ್, ಅ. 19: ಯುಎಇಯ ತುಂಬೆ ಗ್ರೂಪ್‌ನ ಪ್ರಮುಖ ಶೈಕ್ಷಣಿಕ ಸಂಸ್ಥೆಯಾಗಿರುವ ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ (ಜಿಎಂಯು), ಕ್ಯೂಎಸ್ ವಿಶ್ವ ವಿಶ್ವವಿದ್ಯಾಲಯಗಳ ಅರಬ್ ವಲಯದ ರ್ಯಾಂಕಿಂಗ್ 2027ರಲ್ಲಿ ಮೊದಲ ಬಾರಿಗೆ ಸ್ಥಾನ ಪಡೆದಿದ್ದು, ಒಟ್ಟಾರೆ 125ನೇ ಸ್ಥಾನ ಗಳಿಸಿದೆ. ಅಂತರರಾಷ್ಟ್ರೀಯ ವಿದ್ಯಾರ್ಥಿಗಳ ಅನುಪಾತದಲ್ಲಿ ಅರಬ್ ವಲಯದಲ್ಲೇ ಮೊದಲ ಸ್ಥಾನ ಪಡೆದು ಗಮನಾರ್ಹ ಸಾಧನೆ ಮಾಡಿದೆ.
ಇತ್ತೀಚೆಗೆ ಟೈಮ್ಸ್ ಹೈಯರ್ ಎಜುಕೇಶನ್ (THE) ವಿಶ್ವ ವಿಶ್ವವಿದ್ಯಾಲಯಗಳ ರ್ಯಾಂಕಿಂಗ್ 2027ರಲ್ಲಿ ಜಾಗತಿಕ ಮಟ್ಟದಲ್ಲಿ ಅಂತರರಾಷ್ಟ್ರೀಯ ದೃಷ್ಟಿಕೋನ ವಿಭಾಗದಲ್ಲಿ ಜಿಎಂಯು ಮೊದಲ ಸ್ಥಾನ ಗಳಿಸಿತ್ತು. 118 ದೇಶಗಳು ಮತ್ತು ಪ್ರದೇಶಗಳ 2,297 ವಿಶ್ವವಿದ್ಯಾಲಯಗಳ ಪೈಕಿ 99.4 ಅಂಕಗಳೊಂದಿಗೆ ಅತ್ಯುನ್ನತ ಸ್ಥಾನ ಪಡೆದಿತ್ತು. THE ವಿಶ್ವ ರ‍್ಯಾಂಕಿಂಗ್‌ನಲ್ಲಿ ಜಿಎಂಯು ಮೊದಲ ಬಾರಿಗೆ ಸ್ಥಾನ ಪಡೆದಿದ್ದು, 1,001–1,200ರ ವಿಭಾಗದಲ್ಲಿ ಗುರುತಿಸಿಕೊಂಡಿದೆ. 2027ರ ಆವೃತ್ತಿಯಲ್ಲಿ ಸ್ಥಾನ ಪಡೆದ ಯುಎಇಯ ಏಕೈಕ ವಿಶೇಷ ವೈದ್ಯಕೀಯ ಮತ್ತು ಆರೋಗ್ಯ ವಿಜ್ಞಾನ ವಿಶ್ವವಿದ್ಯಾಲಯ ಎಂಬ ಹೆಗ್ಗಳಿಕೆಯನ್ನೂ ಗಳಿಸಿದೆ. ವಿಭಿನ್ನ ಮೌಲ್ಯಮಾಪನ ವಿಧಾನಗಳನ್ನು ಅನುಸರಿಸುವ ಎರಡು ಸ್ವತಂತ್ರ ರ್ಯಾಂಕಿಂಗ್ ಸಂಸ್ಥೆಗಳು ಜಿಎಂಯುನ ಅಂತರರಾಷ್ಟ್ರೀಯ ದೃಷ್ಟಿಕೋನ ಮತ್ತು ಜಾಗತಿಕ ವ್ಯಾಪ್ತಿಯನ್ನು ಗುರುತಿಸಿರುವುದು ವಿಶೇಷವಾಗಿದೆ.
ಜಿಎಂಯುನಲ್ಲಿ ವಿವಿಧ ಖಂಡಗಳ ವಿದ್ಯಾರ್ಥಿಗಳೊಂದಿಗೆ ಕಲಿಯುವ ಅವಕಾಶವಷ್ಟೇ ಅಲ್ಲದೆ, ಸಮಗ್ರ ಶೈಕ್ಷಣಿಕ ಆರೋಗ್ಯ ವ್ಯವಸ್ಥೆಯ ಭಾಗವಾಗಿ ಪ್ರಾಯೋಗಿಕ ತರಬೇತಿಯನ್ನೂ ಪಡೆಯಬಹುದು. ತರಗತಿಗಳಿಂದ ನೇರವಾಗಿ ಕ್ಲಿನಿಕಲ್ ತರಬೇತಿ ಕೇಂದ್ರಗಳಿಗೆ ತೆರಳಿ, ತುಂಬೆ ಯೂನಿವರ್ಸಿಟಿ ಹಾಸ್ಪಿಟಲ್ ಹಾಗೂ ತುಂಬೆ ಹೆಲ್ತ್‌ಕೇರ್ ನೆಟ್‌ವರ್ಕ್‌ನ ವಿವಿಧ ಘಟಕಗಳಲ್ಲಿ ವಿದ್ಯಾರ್ಥಿಗಳು ಪ್ರಾಯೋಗಿಕ ಅನುಭವ ಗಳಿಸುತ್ತಾರೆ. ಬಹುಸಂಸ್ಕೃತಿಯ ವೈದ್ಯಕೀಯ ತಂಡಗಳೊಂದಿಗೆ ಕಾರ್ಯನಿರ್ವಹಿಸುವ ಮತ್ತು ವಿವಿಧ ಹಿನ್ನೆಲೆಯ ರೋಗಿಗಳಿಗೆ ಚಿಕಿತ್ಸೆ ನೀಡುವ ಮೂಲಕ ಭವಿಷ್ಯದ ವೈದ್ಯರು ನೈಜ ಆರೋಗ್ಯ ಸೇವಾ ಪರಿಸರದಲ್ಲಿ ತರಬೇತಿ ಪಡೆಯುತ್ತಾರೆ.
THE ಅರಬ್ ವಿಶ್ವವಿದ್ಯಾಲಯಗಳ ರ್ಯಾಂಕಿಂಗ್ 2026ರಲ್ಲಿ 268 ಸಂಸ್ಥೆಗಳ ಪೈಕಿ ಜಿಎಂಯು 101–125ರ ವಿಭಾಗದಲ್ಲಿ ಸ್ಥಾನ ಪಡೆದಿತ್ತು. ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿ ಗುರಿಗಳ ಸಾಧನೆಯನ್ನು ಅಳೆಯುವ THE ಇಂಪ್ಯಾಕ್ಟ್ ರ್ಯಾಂಕಿಂಗ್ 2026ರಲ್ಲಿ 1,646 ಸಂಸ್ಥೆಗಳ ಪೈಕಿ 301–400ರ ವಿಭಾಗದಲ್ಲಿ ಗುರುತಿಸಿಕೊಂಡಿತ್ತು. ಈ ರ‍್ಯಾಂಕಿಂಗ್‌ನಲ್ಲಿ ಅಸಮಾನತೆಗಳ ಕಡಿತಕ್ಕೆ ಸಂಬಂಧಿಸಿದ ಎಸ್‌ಡಿಜಿ-10 ವಿಭಾಗದಲ್ಲಿ ಜಾಗತಿಕವಾಗಿ 23ನೇ ಸ್ಥಾನ, ಗುಣಮಟ್ಟದ ಶಿಕ್ಷಣದ ಎಸ್‌ಡಿಜಿ-4 ವಿಭಾಗದಲ್ಲಿ 60ನೇ ಸ್ಥಾನ ಹಾಗೂ ಉತ್ತಮ ಆರೋಗ್ಯ ಮತ್ತು ಯೋಗಕ್ಷೇಮದ ಎಸ್‌ಡಿಜಿ-3 ವಿಭಾಗದಲ್ಲಿ 64ನೇ ಸ್ಥಾನ ಗಳಿಸಿತ್ತು. ಜತೆಗೆ, ಕ್ಯೂಎಸ್ ವಿಶ್ವ ವಿಶ್ವವಿದ್ಯಾಲಯಗಳ ವಿಷಯವಾರು ರ್ಯಾಂಕಿಂಗ್ 2026ರಲ್ಲಿ ಜಿಎಂಯುನ ಕಾಲೇಜ್ ಆಫ್ ಫಾರ್ಮಸಿ, ಫಾರ್ಮಸಿ ಮತ್ತು ಫಾರ್ಮಕಾಲಜಿ ವಿಭಾಗದಲ್ಲಿ 351–400ರ ವಿಭಾಗದಲ್ಲಿ ಸ್ಥಾನ ಪಡೆದಿತ್ತು.
1998ರಲ್ಲಿ ಸ್ಥಾಪನೆಯಾದ ಜಿಎಂಯು, ಫೌಂಡೇಶನ್ ಕೋರ್ಸ್‌ಗಳು ಮತ್ತು ಡಿಪ್ಲೊಮಾಗಳಿಂದ ಹಿಡಿದು ಪದವಿ, ಸ್ನಾತಕೋತ್ತರ ಹಾಗೂ ಡಾಕ್ಟರೇಟ್ ಪದವಿಗಳವರೆಗೆ 50ಕ್ಕೂ ಹೆಚ್ಚು ಶೈಕ್ಷಣಿಕ ಕಾರ್ಯಕ್ರಮಗಳನ್ನು ನೀಡುತ್ತಿದೆ. ಇಂಟರ್ನ್‌ಶಿಪ್ ಮತ್ತು ರೆಸಿಡೆನ್ಸಿ ತರಬೇತಿ ಕಾರ್ಯಕ್ರಮಗಳೂ ಲಭ್ಯವಿವೆ. ವೈದ್ಯಕೀಯ, ದಂತವೈದ್ಯಕೀಯ, ಫಾರ್ಮಸಿ, ನರ್ಸಿಂಗ್, ಆರೋಗ್ಯ ವಿಜ್ಞಾನ, ಆರೋಗ್ಯ ನಿರ್ವಹಣೆ ಹಾಗೂ ಆರೋಗ್ಯ ಕ್ಷೇತ್ರದಲ್ಲಿ ಕೃತಕ ಬುದ್ಧಿಮತ್ತೆ ಸೇರಿದಂತೆ ವಿವಿಧ ವಿಷಯಗಳಲ್ಲಿ ಶಿಕ್ಷಣ ನೀಡಲಾಗುತ್ತಿದೆ.
ವಿಶ್ವದ 116ಕ್ಕೂ ಹೆಚ್ಚು ದೇಶಗಳ ವಿದ್ಯಾರ್ಥಿಗಳು ಇಲ್ಲಿ ವ್ಯಾಸಂಗ ಮಾಡುತ್ತಿದ್ದು, 56 ದೇಶಗಳ ಬೋಧಕ ವರ್ಗ ಶಿಕ್ಷಣ ನೀಡುತ್ತಿದೆ. ಜಿಎಂಯುನ 5,000ಕ್ಕೂ ಹೆಚ್ಚು ಪದವೀಧರರು ವಿಶ್ವದ ವಿವಿಧ ಭಾಗಗಳ ಆರೋಗ್ಯ ಸೇವಾ ವ್ಯವಸ್ಥೆಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.
2026ರ ಜೂನ್‌ನಲ್ಲಿ ಜಿಎಂಯು, ಬ್ರಿಟನ್‌ನ ಕ್ವಾಲಿಟಿ ಅಶ್ಯೂರನ್ಸ್ ಏಜೆನ್ಸಿ ಫಾರ್ ಹೈಯರ್ ಎಜುಕೇಶನ್ (QAA) ಸಂಸ್ಥೆಯಿಂದ ಸಾಂಸ್ಥಿಕ ಮಾನ್ಯತೆ ಪಡೆದಿದೆ. ವಿಶ್ವ ವೈದ್ಯಕೀಯ ಶಿಕ್ಷಣ ಒಕ್ಕೂಟ, ಅಮೆರಿಕದ ಅಕ್ರೆಡಿಟೇಶನ್ ಕೌನ್ಸಿಲ್ ಫಾರ್ ಫಾರ್ಮಸಿ ಎಜುಕೇಶನ್, ವರ್ಲ್ಡ್ ಫಿಸಿಯೋಥೆರಪಿ, ಆಸ್ಟ್ರೇಲಿಯನ್ ಡೆಂಟಲ್ ಕೌನ್ಸಿಲ್ ಹಾಗೂ ಬ್ರಿಟನ್‌ನ ಇನ್‌ಸ್ಟಿಟ್ಯೂಟ್ ಆಫ್ ಬಯೋಮೆಡಿಕಲ್ ಸೈನ್ಸಸ್ ಸಂಸ್ಥೆಗಳ ಮಾನ್ಯತೆಗಳನ್ನೂ ಹೊಂದಿದೆ. ವಿಶ್ವವಿದ್ಯಾಲಯದ ಎಲ್ಲ ಶೈಕ್ಷಣಿಕ ಕಾರ್ಯಕ್ರಮಗಳಿಗೆ ಯುಎಇಯ ಕಮಿಷನ್ ಫಾರ್ ಅಕಾಡೆಮಿಕ್ ಅಕ್ರೆಡಿಟೇಶನ್‌ನ ಮಾನ್ಯತೆ ಲಭಿಸಿದೆ. ಇದಲ್ಲದೆ, 2026ರಲ್ಲಿ ಅಂತರರಾಷ್ಟ್ರೀಯ ಒಳಗೊಳ್ಳುವಿಕೆ ಪ್ರಶಸ್ತಿ ಹಾಗೂ ವೈವಿಧ್ಯತೆಯ ಚಾಂಪಿಯನ್ ಪ್ರಶಸ್ತಿಗಳನ್ನೂ ಜಿಎಂಯು ಪಡೆದುಕೊಂಡಿದೆ.
2027ರ ವಸಂತ ಋತುವಿನ ಶೈಕ್ಷಣಿಕ ಪ್ರವೇಶಾತಿ ಪ್ರಕ್ರಿಯೆ ಈಗಾಗಲೇ ಆರಂಭವಾಗಿದೆ. ಯುಎಇ ಸೇರಿದಂತೆ ವಿವಿಧ ದೇಶಗಳ ವಿದ್ಯಾರ್ಥಿಗಳು ವೈದ್ಯಕೀಯ ಮತ್ತು ಆರೋಗ್ಯ ವಿಜ್ಞಾನ ಕ್ಷೇತ್ರಗಳಲ್ಲಿ ಉನ್ನತ ಶಿಕ್ಷಣ ಪಡೆಯಲು ಜಿಎಂಯು ನೀಡುವ ಕೋರ್ಸ್‌ಗಳು, ವಿದ್ಯಾರ್ಥಿವೇತನಗಳು ಹಾಗೂ ಪ್ರವೇಶಾತಿ ವಿವರಗಳನ್ನು www.gmu.ac.ae ವೆಬ್‌ಸೈಟ್‌ನಲ್ಲಿ ಪರಿಶೀಲಿಸಬಹುದು.
