‎ಅಂದಿನ ಆಸೆಗಳು… ಇಂದಿನ ಜವಾಬ್ದಾರಿಗಳು… ನಾಳೆಯ ಕನಸುಗಳು…

‎ಚಿಕ್ಕವರಿದ್ದಾಗ ಬಣ್ಣ ಬಣ್ಣದ ಪೆನ್ಸಿಲ್‌ಗಳಿಗಾಗಿ ಹಾತೊರೆದ ದಿನಗಳೆಷ್ಟೋ…!
‎ಅಂದು ಕೇಳಿದ ತಕ್ಷಣ ತೆಗೆದುಕೊಡುವವರು ತುಂಬಾ ಕಡಿಮೆ. ಕೇಳಿ ಪಡೆದುಕೊಳ್ಳುವುದಕ್ಕಿಂತ ಬಡತನವೇ ಬೆನ್ನಟ್ಟುತ್ತಿದ್ದ ದಿನಗಳವು.


‎
‎ಅಂಗಡಿಗೆ ಹೋಗಬೇಕೆಂದರೆ ಅಜ್ಜಿಯ ಕೈಯಿಂದ ಒಂದೆರಡು ರೂಪಾಯಿಗಳನ್ನು ಲಪಟಾಯಿಸಿ,

ಅವುಗಳನ್ನು ನಿಧಾನವಾಗಿ ಕೂಡಿಡುತ್ತಿದ್ದೆವು. ಡಬ್ಬಿ ತುಂಬಿದಾಗ ಆ ನಾಣ್ಯಗಳನ್ನೆಲ್ಲ ಎಣಿಸಿ,

ಶಾಲೆಗೆ ಬೇಕಾದ ಪುಸ್ತಕಗಳನ್ನು ಕೊಂಡುಕೊಳ್ಳುವಾಗ ಸಿಗುತ್ತಿದ್ದ ಸಂಭ್ರಮವೇ ಬೇರೆ!


‎
‎ಆದರೆ ಇಂದು…
‎ನಮ್ಮ ಕಾಲ ಮೇಲೆ ನಾವು ನಿಂತಿದ್ದೇವೆ. ಕೈಯಲ್ಲಿ ಒಂದಿಷ್ಟು ಹಣವೂ ಇದೆ.

ಮನಸ್ಸಿಗೆ ಬೇಕಾದಷ್ಟು ಪುಸ್ತಕ, ಪೆನ್ನು, ಬಣ್ಣದ ಪೆನ್ಸಿಲ್‌ಗಳನ್ನು ಕೊಂಡುಕೊಳ್ಳುವ ಸಾಮರ್ಥ್ಯವೂ ಇದೆ.

ಆದರೆ ಅಂದು ಇದ್ದ ಆ ಸಂಭ್ರಮವನ್ನು ಆಸ್ವಾದಿಸಲು ಇಂದು ಸಮಯವೇ ಇಲ್ಲ!

ಸಮಯದ ಅಭಾವದಲ್ಲಿ ಎಲ್ಲವೂ ಸಾಧ್ಯವಿದ್ದರೂ, ಮನಸ್ಸಿಗೆ ಇಷ್ಟವಾದ ಸಣ್ಣಪುಟ್ಟ ಆಸೆಗಳನ್ನು ಈಡೇರಿಸಿಕೊಂಡು ಸಂಭ್ರಮಿಸುವ ಸಮಯವೇ ಕಡಿಮೆಯಾಗಿದೆ.


‎
‎ಜವಾಬ್ದಾರಿಗಳು ಹೆಚ್ಚಾದ ಕಾರಣ, ಬದುಕಿನ ಹಾದಿಯಲ್ಲಿ ಸಾಗುವಾಗ ಒಂದಿಷ್ಟು ನೋವುಗಳಿದ್ದರೂ ಮನಸ್ಸಿಗೊಂದು ನೆಮ್ಮದಿ ಅಂತೂ ಇದೆ.


‎
‎ಯಾಕೆಂದರೆ, ಯಾರ ಋಣದಲ್ಲೂ ಬದುಕುವುದಕ್ಕಿಂತ ದೇವರು ಕೊಟ್ಟ ಬದುಕಿನಲ್ಲಿ ಸ್ವಂತ ಪರಿಶ್ರಮದಿಂದ ಬದುಕುತ್ತಿದ್ದೇವೆ ಎಂಬ ತೃಪ್ತಿಯೇ ದೊಡ್ಡದು.
‎
‎ಕಾಮ, ಕ್ರೋಧ, ಲೋಭ, ಮೋಹ, ಮದ, ಮತ್ಸರ…
‎ಇವೆಲ್ಲವೂ ಮನುಷ್ಯನೊಳಗೆ ಹುದುಗಿರುವ ಸಹಜ ಗುಣಗಳು. ಆದರೆ ಇವುಗಳನ್ನೆಲ್ಲ ಮೀರಿ ಬದುಕನ್ನು ನೋಡುವ ದೃಷ್ಟಿಕೋನ ನಮ್ಮದಾಗಬೇಕು.
‎
‎ಬದುಕು ಕೆಲವೊಮ್ಮೆ ಶೂನ್ಯವೆನಿಸಿದರೂ, ನಾವು ಮಾಡುವ ಕೆಲಸ, ಮುಂದಿನ ದಿನಗಳಿಗಾಗಿ ನಡೆಸುವ ತಯಾರಿ, ನಮ್ಮ ನಡೆನುಡಿ, ನಮ್ಮ ಯಶಸ್ಸು, ನಮ್ಮ ಸಾಧನೆ ಎಂಬ ಛಲವೇ ಬದುಕಿಗೆ ಹೊಸ ಅರ್ಥ ನೀಡುತ್ತದೆ.


‎
‎ಅದರ ಜೊತೆಗೆ ನಾವು ನಂಬಿದ ದೇವರ ಆಶೀರ್ವಾದ, ತಂದೆ-ತಾಯಿಯ ಹಾರೈಕೆ ನಮ್ಮೊಂದಿಗಿದ್ದರೆ, ಯಶಸ್ಸಿನ ಹಾದಿಯಲ್ಲಿ ಮುನ್ನಡೆಯುವ ಧೈರ್ಯ ಖಂಡಿತ ಸಿಗುತ್ತದೆ.


‎
‎ಅನುಭವಿಸಿದ ನೋವುಗಳೇನೂ ಕಡಿಮೆಯಿಲ್ಲ…
‎ಆದರೆ ಎಲ್ಲವನ್ನೂ ಸಹಿಸಿಕೊಳ್ಳುವ ತಾಳ್ಮೆಯನ್ನು ಭಗವಂತ ಕೊಟ್ಟ.


‎
‎ಉತ್ತರ ಸಿಗದಿದ್ದ ಕೆಲವು ಪ್ರಶ್ನೆಗಳಿಗೆ ಕಾಲವೇ ಉತ್ತರ ನೀಡಿತು. ಕುಗ್ಗಿದ ಮನಸ್ಸಿಗೆ ಮತ್ತೆ ಚೇತರಿಸಿಕೊಳ್ಳುವ ಶಕ್ತಿ ನೀಡಿತು. ಬದುಕನ್ನು ನಾವೇ ರೂಪಿಸಿಕೊಳ್ಳುವ ಧೈರ್ಯವನ್ನೂ ಕೊಟ್ಟಿತು.


‎
‎ಕೊನೆಗೆ ಅರಿವಾದ ಸತ್ಯವೊಂದೇ…
‎
‎ಬದುಕಿನಲ್ಲಿ ಎಲ್ಲವೂ ನಮ್ಮ ಇಚ್ಛೆಯಂತೆ ನಡೆಯದಿದ್ದರೂ, ಸಿಕ್ಕಿದ್ದರಲ್ಲಿ ಸಂತೃಪ್ತಿ ಕಂಡುಕೊಂಡು, ನಮ್ಮ ಪರಿಶ್ರಮದ ಮೇಲೆ ನಂಬಿಕೆಯಿಟ್ಟು, ದೇವರ ಆಶೀರ್ವಾದದೊಂದಿಗೆ ಮುನ್ನಡೆಯುವುದೇ ನಿಜವಾದ ಜೀವನ.

-ಬರವಣಿಗೆ
‎ರಶ್ಮಿತಾ ಆಚಾರ್ಯ ಹೊಸಂಗಡಿ

SHARE
Loading spinner

Leave a Reply

Your email address will not be published. Required fields are marked *

error: Content is protected !!