ಎರ್ನಾಕುಲಂ: ಮಾದಕವಸ್ತು ಸಾಗಾಟ ಪ್ರಕರಣದಲ್ಲಿ ಬಂಧಿತನಾಗಿರುವ ಹರಿಪಾಡ್ ಪಾಯಿಪಾಡ್ ನಿವಾಸಿ ಧನೇಶ್ ಎಸ್. ನಾಯರ್, ಬಾಳೆಗೊನೆಗಳಲ್ಲಿ ಎಂಡಿಎಂಎ (MDMA) ಅಡಗಿಸಿಟ್ಟು ಸಾಗಾಟ ಮಾಡುವ ದಂಧೆಯನ್ನು 2023ರಿಂದಲೇ ಆರಂಭಿಸಿದ್ದ ಎನ್ನುವುದು ತನಿಖೆಯಲ್ಲಿ ತಿಳಿದುಬಂದಿದೆ.
ಕರ್ನಾಟಕದಲ್ಲಿ ಧನೇಶ್‌ಗೆ ಆರು ಎಕರೆ ವಿಸ್ತೀರ್ಣದ ಬಾಳೆ ತೋಟವಿದೆ. ನೈಜೀರಿಯನ್ನರಿಂದ ಎಂಡಿಎಂಎ ಪಡೆಯುತ್ತಿದ್ದುದಾಗಿ ಧನೇಶ್ ಪೊಲೀಸರಿಗೆ ನೀಡಿರುವ ಹೇಳಿಕೆಯಲ್ಲಿ ತಿಳಿಸಿದ್ದಾನೆ.
ತಾನೇ ಸ್ವತಃ ಹಾಗೂ ಇತರರ ಮೂಲಕವೂ ಎಂಡಿಎಂಎಯನ್ನು ಕೊಚ್ಚಿಗೆ ಸಾಗಿಸುತ್ತಿದ್ದನು. ಮಾದಕವಸ್ತುವನ್ನು ಕೊಚ್ಚಿಗೆ ತಲುಪಿಸಲು ಕೆಲವರನ್ನು ಬೆಂಗಳೂರಿಗೆ ಕರೆಸಿಕೊಳ್ಳುತ್ತಿದ್ದನು.
ಕಿಲೋಗಟ್ಟಲೆ ಎಂಡಿಎಂಎ ಸಂಗ್ರಹಿಸಿ, ಅದನ್ನು ಸಣ್ಣ ಪ್ರಮಾಣದಲ್ಲಿ ಚಿಲ್ಲರೆ ಮಾರಾಟ ಮಾಡುವುದು ಧನೇಶ್‌ನ ಕಾರ್ಯವಿಧಾನವಾಗಿತ್ತು.
ಧನೇಶ್ ಬಂಧನವಾಗುತ್ತಿದ್ದಂತೆ ಮಾದಕವಸ್ತು ಮಾರಾಟ ಜಾಲದ ಹಲವು ಸದಸ್ಯರು ತಲೆಮರೆಸಿಕೊಂಡಿದ್ದಾರೆ. ಇದೀಗ ಆರೋಪಿಗಳ ಬ್ಯಾಂಕ್ ಖಾತೆಗಳನ್ನು ಕೇಂದ್ರವಾಗಿಟ್ಟುಕೊಂಡು ಪೊಲೀಸರು ಹಣಕಾಸಿನ ವಹಿವಾಟಿನ ವಿವರಗಳನ್ನು ಸಂಗ್ರಹಿಸಲು ಆರಂಭಿಸಿದ್ದಾರೆ.
