ಕಾಸರಗೋಡು : ಪೆರಿಯ ಆಯಂಬಾರ ಕಾನತ್ತಿಲ್ನ ಮಾಲತಿ ಎಂಬುವರ ಮನೆಯಲ್ಲಿ ವಿಚಿತ್ರ ಘಟನೆಯೊಂದು ನಡೆದಿದೆ. ಕೊಟ್ಟಿಗೆಯಲ್ಲಿದ್ದ ಹುಂಜವನ್ನು ತಿನ್ನಲು ಬಂದ ದೊಡ್ಡ ಹೆಬ್ಬಾವೊಂದು, ಕೋಳಿಯ ಜೊತೆಗೆ ಅದನ್ನು ಕಟ್ಟಿಹಾಕಿದ್ದ ಹಗ್ಗವನ್ನೂ ನುಂಗಿ ಸಿಕ್ಕಿಬಿದ್ದಿದೆ.
ಬೆಳಿಗ್ಗೆ ಕೋಳಿಗೆ ತೀಟ ನೀಡಲು ಹೋದ ಮಾಲತಿಯವರಿಗೆ ಕೋಳಿ ಕಾಣದೆ, ಮೂಲೆಯಲ್ಲಿ ದಪ್ಪಗಾಗಿ ಬಿದ್ದಿದ್ದ ಹೆಬ್ಬಾವು ಕಾಣಸಿಕ್ಕಿದೆ. ಗಾಬರಿಗೊಂಡು ಅವರು ಗದ್ದಲ ಎಬ್ಬಿಸಿದಾಗ ನೆರೆಹೊರೆಯವರು ಧಾವಿಸಿ ಬಂದಿದ್ದಾರೆ. ಹಗ್ಗದ ಒಂದು ತುದಿಯನ್ನು ನುಂಗಿ, ಇನ್ನೊಂದು ತುದಿ ಹೊರಗೆ ಸಿಲುಕಿದ್ದರಿಂದ ಹೆಬ್ಬಾವಿಗೆ ಅತ್ತ ಇತ್ತ ಚಲಿಸಲು ಸಾಧ್ಯವಾಗುತ್ತಿರಲಿಲ್ಲ.
ತಕ್ಷಣವೇ ಉರಗ ರಕ್ಷಕ ಕೆ.ಟಿ.ಎಸ್. ಪನಯಾಲ್ ಸ್ಥಳಕ್ಕೆ ಆಗಮಿಸಿ, ಜಾಗರೂಕತೆಯಿಂದ ಹಗ್ಗವನ್ನು ತುಂಡರಿಸಿ ಹೆಬ್ಬಾವನ್ನು ಸುರಕ್ಷಿತವಾಗಿ ರಕ್ಷಿಸಿದ್ದಾರೆ.
