ವಾಷಿಂಗ್ಟನ್: ಅಮೆರಿಕದ ಸೈನಿಕರನ್ನು ಇರಾನ್ ಹತ್ಯೆಗೈದರೆ ಮತ್ತೆ ಸೇನಾ ಕಾರ್ಯಾಚರಣೆ ಆರಂಭಿಸಲು ಅದು ಸಾಕಷ್ಟು ಕಾರಣವಾಗಲಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ.
ಶ್ವೇತಭವನದಲ್ಲಿ ಮಾತನಾಡಿದ ಅವರು, ಇರಾನ್ನ ಸೇನಾ ಸಾಮರ್ಥ್ಯ, ನೌಕಾಪಡೆ, ವಾಯುಪಡೆ ಹಾಗೂ ನಾಯಕತ್ವವನ್ನು ಅಮೆರಿಕ ಈಗಾಗಲೇ ತೀವ್ರವಾಗಿ ದುರ್ಬಲಗೊಳಿಸಿದೆ ಎಂದು ಹೇಳಿದರು. ಇರಾನ್ನ 159 ಹಡಗುಗಳು ಮುಳುಗಿದ್ದು, ಅದಕ್ಕೆ ಸಂಬಂಧಿಸಿದ ಚಿತ್ರಗಳು ತಮ್ಮ ಬಳಿ ಇವೆ ಎಂದರು.
ಇದರ ನಡುವೆ, ಇರಾನ್ ವಿರುದ್ಧ ಮುಂದಿನ ಸೇನಾ ಕ್ರಮಕ್ಕೆ ಕಾಂಗ್ರೆಸ್ ಅನುಮತಿ ಕಡ್ಡಾಯಗೊಳಿಸುವ ನಿರ್ಣಯವನ್ನು ಅಮೆರಿಕ ಪ್ರತಿನಿಧಿಗಳ ಸಭೆ 215-208 ಮತಗಳ ಅಂತರದಲ್ಲಿ ಅಂಗೀಕರಿಸಿದೆ. ನಾಲ್ವರು ರಿಪಬ್ಲಿಕನ್ ಸದಸ್ಯರು ಡೆಮಾಕ್ರಾಟ್ಗಳೊಂದಿಗೆ ಸೇರಿ ನಿರ್ಣಯವನ್ನು ಬೆಂಬಲಿಸಿದ್ದು, ಇದೀಗ ಅದು ಸೆನೆಟ್ಗೆ ರವಾನೆಯಾಗಿದೆ.
ಫೆಬ್ರವರಿ 28ರಂದು ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ವಿರುದ್ಧ ದಾಳಿ ಆರಂಭಿಸಿದ ಬಳಿಕ ಟ್ರಂಪ್ ಅವರ ಯುದ್ಧಾಧಿಕಾರಕ್ಕೆ ಎದುರಾದ ಮೊದಲ ಪ್ರಮುಖ ಸವಾಲು ಇದಾಗಿದೆ. ಆದರೆ ಸೆನೆಟ್ನಲ್ಲೂ ನಿರ್ಣಯ ಅಂಗೀಕಾರಗೊಂಡರೆ ಟ್ರಂಪ್ ವೀಟೊ ಹಾಕುವ ಸಾಧ್ಯತೆ ಇದೆ.
ನಿರ್ಣಯವನ್ನು “ಅರ್ಥಹೀನ” ಎಂದು ಟೀಕಿಸಿರುವ ಟ್ರಂಪ್, ತಮ್ಮ ಯುದ್ಧಾಧಿಕಾರವನ್ನು ಮಿತಿಗೊಳಿಸುವ ಪ್ರಯತ್ನ ದೇಶಭಕ್ತಿಯಿಲ್ಲದ ನಡೆ ಎಂದು ಆರೋಪಿಸಿದ್ದಾರೆ. ಜೊತೆಗೆ ಡೆಮಾಕ್ರಾಟ್ಗಳನ್ನು ಟೀಕಿಸಿದ ಅವರು, ನಿರ್ಣಯ ಬೆಂಬಲಿಸಿದ ನಾಲ್ವರು ರಿಪಬ್ಲಿಕನ್ ಸದಸ್ಯರನ್ನು “ಪ್ರಚಾರಪ್ರಿಯರು” ಎಂದು ಕರೆದಿದ್ದಾರೆ.
