ಕಾಸರಗೋಡು : ರೇಷನ್ ವಲಯದ ವಿವಿಧ ಸಮಸ್ಯೆಗಳ ಪರಿಹಾರಕ್ಕಾಗಿ ಆಲ್ ಕೇರಳ ರಿಟೈಲ್ ರೇಶನ್ ಡೀಲರ್ಸ್ ಅಸೋಸಿಯೇಷನ್ ಕಾಸರಗೋಡು ತಾಲೂಕು ಸಮಿತಿ ನೇತೃತ್ವದಲ್ಲಿ ಕಾಸರಗೋಡು ಪ್ರಧಾನ ಅಂಚೆ ಕಚೇರಿ ಮುಂಭಾಗ ಧರಣಿ ಸತ್ಯಾಗ್ರಹ ನಡೆಯಿತು.
ಉದುಮ ಶಾಸಕ ಕೆ. ನೀಲಕಂಠನ್ ಪ್ರತಿಭಟನೆಯನ್ನು ಉದ್ಘಾಟಿಸಿದರು.
ಡಿಬಿಟಿ ಪದ್ಧತಿ ಹಾಗೂ ಎಎವೈ ಕಾರ್ಡ್‌ದಾರರ ಧಾನ್ಯ ಕಡಿತದ ಯತ್ನವನ್ನು ಕೈಬಿಡಬೇಕು, ಒಬ್ಬ ವ್ಯಕ್ತಿಗೆ ತಿಂಗಳಿಗೆ 13.5 ಕಿಲೋ ಆಹಾರ ಧಾನ್ಯ ನೀಡಬೇಕು, ಸೀಮೆಎಣ್ಣೆ-ಸಕ್ಕರೆ ಕಡಿತ ಹಿಂಪಡೆಯಬೇಕು ಮತ್ತು ಎಲ್ಲಾ ಕಾರ್ಡ್‌ದಾರರಿಗೆ 10 ಕಿಲೋ ಧಾನ್ಯ ವಿತರಿಸಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು.
ತಾಲೂಕು ಅಧ್ಯಕ್ಷ ಬಾಲಕೃಷ್ಣ ಬಲ್ಲಾಳ್‌ ಅಧ್ಯಕ್ಷತೆ ವಹಿಸಿದ್ದ ಕಾರ್ಯಕ್ರಮದಲ್ಲಿ ಜಿಲ್ಲಾಧ್ಯಕ್ಷ ಸತೀಶನ್ ಇಡವೇಲಿ ಮುಖ್ಯ ಭಾಷಣ ಮಾಡಿದರು. ಪ್ರಮುಖ ನಾಯಕರಾದ ಲೋಹಿತಾಕ್ಷನ್, ವಿಜಯನ್ ನಾಯ‌ರ್, ವಸಂತ ಶೆಣೈ, ಚಂದ್ರನ್ ಚಡವಡ್ಕ ಸೇರಿದಂತೆ ಹಲವರು ಪಾಲ್ಗೊಂಡಿದ್ದರು.
