ಕುಂಬಳೆ : ಕುಂಬಳೆ ಪಂಚಾಯತ್ ಕಚೇರಿ ಕಾಂಪ್ಲೆಕ್ಸ್‌ನ ಕ್ಯಾಂಟೀನ್ ತ್ಯಾಜ್ಯ ನೀರನ್ನು ತೆರೆದ ಜಾಗಕ್ಕೆ ಹರಿಬಿಡುತ್ತಿರುವುದರಿಂದ ಸಮೀಪದ ಮನೆ ಅಂಗಳಗಳು ಹಾಗೂ ಕಾಲುದಾರಿಗಳಲ್ಲಿ ಗಲೀಜು ನೀರು ತುಂಬಿಕೊಂಡು ನಾರುತ್ತಿದ್ದು, ಸ್ಥಳೀಯರ ಜೀವನ ನರಕಸಮಾನವಾಗಿದೆ.
ಹೋಟೆಲ್ ತ್ಯಾಜ್ಯದಿಂದ ಪೈಪ್ ಮುಚ್ಚಿಹೋದಾಗ, ಅದನ್ನು ಸರಿಪಡಿಸುವ ಬದಲು ತುಂಡರಿಸಿ ತೆರೆದ ಜಾಗಕ್ಕೆ ಹರಿದುಬರುವಂತೆ ಮಾಡಿರುವುದೇ ಈ ಸಮಸ್ಯೆಗೆ ಪ್ರಮುಖ ಕಾರಣ.
ಕಳೆದ ಎರಡು ವಾರಗಳಿಂದ ಈ ದುರ್ನಾತ ಹೆಚ್ಚಾಗಿದ್ದರೂ ಪಂಚಾಯತ್ ಅಧಿಕಾರಿಗಳು ಹಾಗೂ ಹೋಟೆಲ್ ಮಾಲಕರು ಯಾವುದೇ ಕ್ರಮ ಕೈಗೊಂಡಿಲ್ಲ.
ಪಂಚಾಯತ್ ಮತ್ತು ಆರೋಗ್ಯ ವಿಭಾಗಕ್ಕೆ ಲಿಖಿತ ದೂರು ನೀಡಿದ್ದರೂ, ಅಧಿಕಾರಿಗಳು ದೂರನ್ನು ಕಡತದಲ್ಲೇ ಬಾಂಧವಿಟ್ಟು ನಿರ್ಲಕ್ಷಿಸಿದ್ದಾರೆನ್ನಲಾಗಿದೆ.
ಸ್ವತಃ ಪಂಚಾಯತ್ ಕಚೇರಿಯಲ್ಲೇ ಈ ಸ್ಥಿತಿ ಇದ್ದರೆ ನಾಡಿನಲ್ಲಿ ಶುಚಿತ್ವ ಎಲ್ಲಿದೆ? ಎಂದು ಸಂತ್ರಸ್ತ ನಿತ್ಯಾನಂದ ಪೈ ಖಾರವಾಗಿ ಪ್ರಶ್ನಿಸಿದ್ದಾರೆ.
ಕೂಡಲೇ ಅಧಿಕಾರಿಗಳು ಎಚ್ಚೆತ್ತು ತ್ಯಾಜ್ಯ ನೀರು ನಿರ್ವಹಣೆಗೆ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಸ್ಥಳೀಯರು ಆಗ್ರಹಿಸಿದ್ದಾರೆ.
