ಪ್ರಜಾಪ್ರಭುತ್ವ ಎನ್ನುವುದು ಒಂದು ಭದ್ರವಾದ ಬೊಕ್ಕಸವಿದ್ದಂತೆ. ಆ ಬೊಕ್ಕಸದ ಒಳಗೆ ನಮ್ಮ ದೇಶದ ಭವಿಷ್ಯ, ನಮ್ಮೂರಿನ ಅಭಿವೃದ್ಧಿ ಮತ್ತು ನಮ್ಮ ಮುಂದಿನ ಪೀಳಿಗೆಯ ಸುಖ-ಶಾಂತಿ ಅಡಗಿದೆ. ಆದರೆ, ಈ ಬೊಕ್ಕಸವನ್ನು ತೆರೆಯುವ ಅಧಿಕಾರ ಇರುವುದು ಕೇವಲ ಆಡಳಿತಗಾರರ ಕೈಯಲ್ಲಲ್ಲ; ಬದಲಾಗಿ ಮತದಾರರಾದ ನಮ್ಮ ಕೈಯಲ್ಲಿದೆ. ಸುಭದ್ರ ಆಡಳಿತ ಎಂಬ ಅಧಿಕಾರವನ್ನು ಚಲಾಯಿಸಲು ಇರುವ ಏಕೈಕ ಕೀಲಿ ಎಂದರೆ ಅದು ನಮ್ಮ ಮತ. ನಾವು ಸರಿಯಾದ ಬೀಗಕ್ಕೆ ಸರಿಯಾದ ಕೀಲಿಯನ್ನು ಹಾಕದಿದ್ದರೆ, ಇಡೀ ವ್ಯವಸ್ಥೆ ತುಕ್ಕು ಹಿಡಿಯುವುದರಲ್ಲಿ ಸಂಶಯವಿಲ್ಲ.
ಒಬ್ಬ ಕೃಷಿಕನಾಗಿ ನಮಗೆ ಗೊತ್ತು, ಹೊಲಕ್ಕೆ ಬೇಲಿ ಹಾಕದಿದ್ದರೆ ಬೆಳೆ ಉಳಿಯುವುದಿಲ್ಲ ಎಂದು. ಹಾಗೆಯೇ, ಜಾಗೃತ ಮತದಾರನಾಗಿ ನಾವು ಮತಗಟ್ಟೆಗೆ ಹೋಗದಿದ್ದರೆ ನಮ್ಮ ಪ್ರಜಾಪ್ರಭುತ್ವಕ್ಕೆ ಭದ್ರತೆ ಇರುವುದಿಲ್ಲ. ಚುನಾವಣೆಯ ದಿನವನ್ನು ರಜೆ ಎಂದು ಭಾವಿಸಿ ಮನೆಯಲ್ಲಿ ಕುಳಿತುಕೊಳ್ಳುವುದು ಎಂದರೆ, ನಮ್ಮ ಹಕ್ಕನ್ನು ನಾವೇ ಕಿತ್ತುಕೊಂಡಂತೆ. ನಾವು ಮತದಾನ ಮಾಡದಿದ್ದರೆ, ನಮ್ಮ ಪರವಾಗಿ ನಿರ್ಧಾರ ತೆಗೆದುಕೊಳ್ಳುವ ಅವಕಾಶವನ್ನು ಅನರ್ಹರಿಗೆ ನೀಡಿದಂತಾಗುತ್ತದೆ. ನಮ್ಮ ಮೌನವೇ ಅವರ ಪಾಲಿನ ಬಂಡವಾಳವಾಗುವಾಗ ವ್ಯವಸ್ಥೆಯನ್ನು ದೂರಿ ಏನು ಪ್ರಯೋಜನ?
ಮತದಾನದ ಮಹತ್ವವನ್ನು ಕೇವಲ ಸಂಖ್ಯೆಗಳಲ್ಲಿ ಅಳೆಯಬೇಡಿ. ಇತಿಹಾಸದ ಪುಟಗಳನ್ನು ತಿರುವಿ ನೋಡಿದರೆ ಒಂದೇ ಒಂದು ಮತವು ದೇಶದ ಹಣೆಬರಹವನ್ನೇ ಬದಲಿಸಿರುವ ಉದಾಹರಣೆಗಳಿವೆ. ಸಾವಿರದ ಒಂಬೈನೂರ ತೊಂಬತ್ತೊಂಬತ್ತರಲ್ಲಿ ಕೇಂದ್ರದಲ್ಲಿ ಅಟಲ್ ಬಿಹಾರಿ ವಾಜಪೇಯಿ ಅವರ ನೇತೃತ್ವದ ಸರ್ಕಾರ ಕೇವಲ ಒಂದೇ ಒಂದು ಮತದ ಕೊರತೆಯಿಂದ ವಿಶ್ವಾಸಮತ ಸೋತು ಅಧಿಕಾರ ಕಳೆದುಕೊಂಡಿತ್ತು. ಅಂದು ಆ ಒಂದು ಮತ ಚಲಾಯಿಸದ ಒಬ್ಬ ಪ್ರತಿನಿಧಿಯ ನಿರ್ಧಾರ ಇಡೀ ದೇಶದ ರಾಜಕೀಯ ದಿಕ್ಕನ್ನೇ ಬದಲಿಸಿತ್ತು. ಹಾಗೆಯೇ, ಎರಡು ಸಾವಿರದ ನಾಲ್ಕರ ಕರ್ನಾಟಕ ವಿಧಾನಸಭಾ ಚುನಾವಣೆಯಲ್ಲಿ ಸಾಂತೇಮರಹಳ್ಳಿ ಕ್ಷೇತ್ರದಲ್ಲಿ ಒಬ್ಬ ಅಭ್ಯರ್ಥಿ ಕೇವಲ ಒಂದೇ ಒಂದು ಮತದ ಅಂತರದಿಂದ ಪರಾಜಯಗೊಂಡರು. ಅಂದು ಮತದಾನ ಮಾಡದ ಆ ಒಬ್ಬ ವ್ಯಕ್ತಿ ನೀವೇ ಆಗಿದ್ದರೆ, ಇತಿಹಾಸ ಬದಲಿಸುವ ಶಕ್ತಿ ನಿಮ್ಮ ಕೈಲಿತ್ತು ಎಂದು ಒಮ್ಮೆ ಊಹಿಸಿ ನೋಡಿ.
ಇಂದಿಗೂ ನಮ್ಮ ಕಾಸರಗೋಡು ಭಾಗದ ಗ್ರಾಮೀಣ ರಸ್ತೆಗಳ ದುಸ್ಥಿತಿ, ಕೃಷಿ ಪಂಪ್ಸೆಟ್ಗಳಿಗೆ ವಿದ್ಯುತ್ ಸಮಸ್ಯೆಗಳ ಬಗ್ಗೆ ನಾವು ಚರ್ಚಿಸುತ್ತೇವೆ. ಈ ಸಮಸ್ಯೆಗಳಿಗೆ ಕೀಲಿ ಕೈ ಇರುವುದು ನಮ್ಮ ಮತದಾನದ ನಿರ್ಧಾರದಲ್ಲಿ ಅಡಗಿದೆ. ಚುನಾವಣೆಯ ಸಂದರ್ಭದಲ್ಲಿ ಹಂಚುವ ಹಣ ಅಥವಾ ಉಡುಗೊರೆಗಳು ಕೇವಲ ಒಂದು ಕ್ಷಣದ ಆಮಿಷಗಳಷ್ಟೇ. ಆ ಸಣ್ಣ ಲಾಭಕ್ಕಾಗಿ ನಾವು ನಮ್ಮ ಐದು ವರ್ಷಗಳ ಆತ್ಮಗೌರವವನ್ನು ಮಾರಿಕೊಳ್ಳುತ್ತಿದ್ದೇವೆ ಎಂಬ ಅರಿವಿರಲಿ. ನಾವು ಪಡೆಯುವ ಆ ಒಂದಿಷ್ಟು ಹಣ ಅಥವಾ ಆಮಿಷಗಳು ಮುಂದಿನ ದಿನಗಳಲ್ಲಿ ನಮಗೆ ಸಿಗಬೇಕಾದ ಗುಣಮಟ್ಟದ ಶಿಕ್ಷಣ, ಉತ್ತಮ ರಸ್ತೆ ಮತ್ತು ರೈತರಿಗೆ ಸಿಗಬೇಕಾದ ನ್ಯಾಯಯುತ ಸೌಲಭ್ಯಗಳನ್ನು ಕಿತ್ತುಕೊಳ್ಳುತ್ತವೆ. ಆಮಿಷದ ಬೆಲೆ ಐದು ವರ್ಷದ ಬವಣೆಯಾಗಿ ನಮ್ಮನ್ನು ಕಾಡುತ್ತದೆ.
ಅಧಿಕಾರ ಎಂಬುದು ಯಾರಿಗೂ ಶಾಶ್ವತವಲ್ಲ, ಆದರೆ ಮತದಾರರಾದ ನಮಗೆ ಇರುವ ಶಕ್ತಿ ಶಾಶ್ವತವಾದದ್ದು. ಬನ್ನಿ, ಈ ಚುನಾವಣೆಯಲ್ಲಿ ಉದಾಸೀನತೆ ಬಿಟ್ಟು ಮತಗಟ್ಟೆಗೆ ಹೆಜ್ಜೆ ಹಾಕೋಣ. ನಿಮ್ಮ ಮತ ಕೇವಲ ಒಬ್ಬ ವ್ಯಕ್ತಿಯನ್ನು ಗೆಲ್ಲಿಸುವುದಿಲ್ಲ, ಅದು ಈ ದೇಶದ ಸಮೃದ್ಧ ಭವಿಷ್ಯಕ್ಕೆ ಹಾಕುವ ಭದ್ರ ಬುನಾದಿ. ನೆನಪಿರಲಿ, ಅಧಿಕಾರದ ಕೀಲಿ ಇರುವುದು ನಮ್ಮ ಮತವೆಂಬ ಬೀಗದಲ್ಲಿ ಮಾತ್ರ.
ಬರಹ: – ದಯಾನಂದ ರೈ ಕಳ್ವಾಜೆ
