ಒಂದು ಆತ್ಮಾವಲೋಕನ
ಚುನಾವಣೆ ಎನ್ನುವುದು ಕೇವಲ ಮತಯಂತ್ರದ ಗುಂಡಿ ಒತ್ತುವ ಯಾಂತ್ರಿಕ ಕ್ರಿಯೆಯಲ್ಲ; ಅದು ನಮ್ಮ ಮೌನಕ್ಕೆ ಸಿಗುವ ಸಂವಿಧಾನದ ಧ್ವನಿ. ಇಂದು ಕೇರಳದ ಹಸಿರು ಮಡಿಲಲ್ಲಿ ಪ್ರಜಾಪ್ರಭುತ್ವದ ಸಂಭ್ರಮ ಮನೆಮಾಡಿದೆ. ಗಡಿಯಂಚಿನ ಕಾಲುದಾರಿಗಳಿಂದ ಹಿಡಿದು ಮಹಾನಗರಗಳ ವರೆಗೆ ಎಲ್ಲೆಡೆ ಮತದಾನದ ಕಲರವ. ಆದರೆ, ಈ ಸಡಗರದ ಬೆನ್ನಲ್ಲೇ ಸಾಮಾನ್ಯ ಮತದಾರನ ಪ್ರಜ್ಞೆಯಲ್ಲಿ ಸಾವಿರಾರು ಪ್ರಶ್ನೆಗಳ ಸುಳಿ ಇದೆ.
ಜನಸಾಮಾನ್ಯರ ಮನದ ಗೊಂದಲಗಳು ಸಹಜವಾದವು. “ನಾನು ನೀಡುವ ಒಂದು ಪುಟ್ಟ ಮತ ಈ ಬೃಹತ್ ಆಡಳಿತ ಯಂತ್ರದ ಜಡತ್ವವನ್ನು ಕಳೆಯಬಲ್ಲದೇ?” ಎಂಬ ಸಂಶಯ ಒಂದು ಕಡೆಯಾದರೆ, ರಾಜಕೀಯ ಸಿದ್ಧಾಂತಗಳ ಅಬ್ಬರದಲ್ಲಿ ಬದುಕಿನ ಅಸಲಿ ಸಂಕಷ್ಟಗಳು ಕಳೆದುಹೋಗುತ್ತಿವೆಯೇ ಎಂಬ ಆತಂಕ ಇನ್ನೊಂದು ಕಡೆ. ಇದಕ್ಕೆ ಉತ್ತರ ವ್ಯಕ್ತಿಯನ್ನು ನೋಡಿ ಮತ ಹಾಕುವುದಲ್ಲ, ಆ ವ್ಯಕ್ತಿಯ ಹಿಂದಿರುವ ಜನಪರ ದೂರದೃಷ್ಟಿಯನ್ನು ಅಳೆಯುವುದು. ಮತದಾರ ತನ್ನನ್ನು ತಾನು ಕೇವಲ ಒಬ್ಬ ‘ಸಂಖ್ಯೆ’ಯಾಗಿ ನೋಡದೆ, ಈ ರಾಷ್ಟ್ರದ ‘ಭಾಗ್ಯವಿಧಾತ’ ಎಂದು ಭಾವಿಸಿದಾಗ ಮಾತ್ರ ಪ್ರಜಾಪ್ರಭುತ್ವಕ್ಕೆ ಅಸ್ತಿತ್ವ ಸಿಗುತ್ತದೆ.
ಗೆದ್ದ ಪ್ರತಿನಿಧಿ ಸಾರ್ವಜನಿಕ ಕಾಳಜಿಯನ್ನು ಉಳಿಸಿಕೊಳ್ಳುತ್ತಾನೆಯೇ ಎಂಬ ಅನುಮಾನಕ್ಕೆ ಪರಿಹಾರ ನಮ್ಮ ನಿರಂತರ ಜಾಗೃತಿಯಲ್ಲಿದೆ. ಪರಿವರ್ತನೆ ಎನ್ನುವುದು ಕೇವಲ ನಾಯಕರಿಂದ ಬರುವುದಿಲ್ಲ, ಬದಲಾಗಿ ನಾವು ಕೇಳುವ ಪ್ರಶ್ನೆಗಳ ಗುಣಮಟ್ಟದಿಂದ ಮೂಡುತ್ತದೆ. ಕೃಷಿಕನ ಶ್ರಮಕ್ಕೆ ಸಿಗಬೇಕಾದ ನ್ಯಾಯಯುತ ಬೆಲೆ, ಅಡಿಕೆ-ತೆಂಗುಗಳ ಮೌಲ್ಯವರ್ಧನೆಕ್ಕೆ ಬೇಕಾದ ತಾಂತ್ರಿಕ ಬೆಂಬಲ ಮತ್ತು ಗಡಿಭಾಗದ ಹಳ್ಳಿಗಳ ಸುಸಜ್ಜಿತ ಸಂಪರ್ಕದ ಕನಸುಗಳು ಕೇವಲ ಪ್ರಣಾಳಿಕೆಯ ಭರವಸೆಗಳಾಗಿ ಉಳಿಯಬಾರದು. ಅವು ಆಡಳಿತದ ಅನಿವಾರ್ಯ ಕಾರ್ಯಸೂಚಿಯಾಗಬೇಕು. ಜ್ಞಾನ ಮತ್ತು ಮಣ್ಣಿನ ಸಂಸ್ಕೃತಿ ಹೊಂದಿರುವ ನಮ್ಮ ನಾಡಿನಲ್ಲಿ, ವೈಜ್ಞಾನಿಕ ಹಾದಿಯ ಸುಸ್ಥಿರ ಪ್ರಗತಿಯೇ ನಾಳೆಯ ಮಂತ್ರವಾಗಬೇಕಿದೆ.
ಗೆಲುವೆಂಬುದು ಕೇವಲ ಅಧಿಕಾರವಲ್ಲ; ಅದೊಂದು ದೊಡ್ಡ ಜವಾಬ್ದಾರಿ. ನಾವು ಆರಿಸಿ ಕಳುಹಿಸುವ ಒಬ್ಬ ಪ್ರತಿನಿಧಿಯ (MLA ಅಥವಾ MP) ಜೀವನದ ಭದ್ರತೆಗೆ ವ್ಯವಸ್ಥೆಯು ಕಲ್ಪಿಸಿರುವ ಸೌಲಭ್ಯಗಳು ಬೆರಗುಗೊಳಿಸುವಂತಿವೆ:
ಮಾಸಿಕ ವೇತನ ಮತ್ತು ಭತ್ಯೆ: ಒಬ್ಬ ಶಾಸಕ ಅಥವಾ ಸಂಸದರಿಗೆ ಲಕ್ಷಾಂತರ ರೂಪಾಯಿಗಳ ಮಾಸಿಕ ವೇತನದ ಜೊತೆಗೆ ಕ್ಷೇತ್ರ ಭತ್ಯೆ, ದೂರವಾಣಿ ಭತ್ಯೆ ಮತ್ತು ಕಚೇರಿ ನಿರ್ವಹಣಾ ವೆಚ್ಚಗಳು ದೊರೆಯುತ್ತವೆ.
ಪ್ರವಾಸ ಸೌಲಭ್ಯ: ರೈಲುಗಳಲ್ಲಿ ಉಚಿತ ಪ್ರಥಮ ದರ್ಜೆ ಪ್ರಯಾಣ, ವಿಮಾನ ಪ್ರಯಾಣಕ್ಕೆ ಸಬ್ಸಿಡಿ ಮತ್ತು ಅಧಿಕೃತ ಪ್ರವಾಸಗಳಿಗೆ ದಿನದ ಭತ್ಯೆಗಳು ಮೀಸಲಿವೆ.
ವಸತಿ ಮತ್ತು ವೈದ್ಯಕೀಯ: ರಾಜಧಾನಿಗಳಲ್ಲಿ ಸುಸಜ್ಜಿತ ಸರ್ಕಾರಿ ಬಂಗಲೆಗಳು ಹಾಗೂ ತಮಗೂ ಮತ್ತು ಕುಟುಂಬಕ್ಕೂ ಉಚಿತ ಅಥವಾ ರಿಯಾಯಿತಿ ದರದ ಅತ್ಯುತ್ತಮ ವೈದ್ಯಕೀಯ ಸೌಲಭ್ಯಗಳು ಲಭ್ಯವಿರುತ್ತವೆ.
ನಿವೃತ್ತಿ ವೇತನ: ಕೇವಲ ಒಂದು ಅವಧಿಗೆ ಆಯ್ಕೆಯಾದರೂ ಸಾಕು, ಜೀವನಪರ್ಯಂತ ಗೌರವಯುತ ‘ಫೆನ್ಷನ್’ ಸೌಲಭ್ಯ ಅವರದಾಗುತ್ತದೆ.
ಇಂದಿನ ತಾಂತ್ರಿಕ ಯುಗದಲ್ಲಿ ನಾವು ಡಿಜಿಟಲ್ ಲೋಕದ ಕ್ಷಣಿಕ ಸುದ್ದಿಗಳ ಬೆನ್ನತ್ತಿ ಜೀವನದ ಮೂಲ ಬೇರುಗಳನ್ನೇ ಮರೆಯುತ್ತಿದ್ದೇವೆ. ಮೊಬೈಲ್ ಪರದೆಯ ಗದ್ದಲದಲ್ಲಿ ಮಣ್ಣಿನ ಘಮಲು ಮತ್ತು ನೈಜ ಮನುಷ್ಯ ಸಂಬಂಧಗಳ ಬೆಲೆ ಕರಗುತ್ತಿದೆ. ಅಧಿಕಾರ ಎನ್ನುವುದು ಆಳುವ ಸೌಲಭ್ಯವಾಗಬಾರದು; ಅದು ಜನರ ಕಣ್ಣೀರು ಒರೆಸುವ ಜವಾಬ್ದಾರಿಯುತ ಹಸ್ತವಾಗಬೇಕು. ಬದಲಾವಣೆ ಎನ್ನುವುದು ಕೇವಲ ಶಾಸನಸಭೆಯ ಗೋಡೆಗಳ ಮಧ್ಯೆ ನಡೆಯುವ ಸಂವಾದವಲ್ಲ; ಅದು ನಮ್ಮ ಪ್ರತಿ ವಿವೇಚನಾಶೀಲ ಮತದ ಮೂಲಕ ಹೊರಹೊಮ್ಮುವ ಮೂಕ ಕ್ರಾಂತಿ.
ಒಬ್ಬ ಪ್ರತಿನಿಧಿಯ ಐದು ವರ್ಷದ ಐಷಾರಾಮಿ ಬದುಕಿಗೆ ಮತ್ತು ಅವರ ನಿವೃತ್ತ ಜೀವನದ ಭದ್ರತೆಗೆ ನಾಂದಿ ಹಾಡುವುದು ನಮ್ಮ ಬೆರಳು ನೀಡುವ ಆ ಒಂದು ‘ಮತ’. ಯೋಚಿಸಿ ನೋಡಿ, ಒಬ್ಬ ಜನಪ್ರತಿನಿಧಿಯ ಇಷ್ಟೆಲ್ಲಾ ಸೌಲಭ್ಯಗಳ ಮೊತ್ತ ಕೋಟಿಗಳನ್ನೇ ಮೀರಬಲ್ಲದಾದರೆ, ಅಂತಹ ಪ್ರತಿನಿಧಿಯನ್ನು ಸೃಷ್ಟಿಸುವ ಮತದಾರನ ಒಂದು ಮತಕ್ಕೆ ಬೆಲೆ ಕಟ್ಟಲು ಸಾಧ್ಯವೇ? ಹನಿ ಹನಿ ಸೇರಿದರೆ ಹಳ್ಳವಾಗುವಂತೆ, ಪ್ರತಿಯೊಬ್ಬ ಪ್ರಜ್ಞಾವಂತನ ನಿರ್ಧಾರವೂ ನಾಡಿನ ಭವಿಷ್ಯದ ಭದ್ರ ಬುನಾದಿ. ನೆನಪಿರಲಿ, ನಾವು ಇಂದು ಚಲಾಯಿಸುವ ಹಕ್ಕು ಕೇವಲ ಒಬ್ಬ ವ್ಯಕ್ತಿಯ ಗೆಲುವನ್ನು ನಿರ್ಧರಿಸುವುದಿಲ್ಲ; ಅದು ನಮ್ಮ ಮುಂದಿನ ತಲೆಮಾರಿನ ಬದುಕಿನ ದಿಕ್ಕನ್ನು ರೂಪಿಸುತ್ತದೆ. ನಮ್ಮ ನಡೆ ಜನಪರವಾಗಿರಲಿ, ನಮ್ಮ ಆಯ್ಕೆ ನಾಡಿನ ಹಿತಕ್ಕಾಗಿರಲಿ.
✍️ ಬರಹ:- ದಯಾನಂದ ರೈ ಕಳ್ವಾಜೆ
