ಮಂಗಳೂರು, ಜು. 28: ಖ್ಯಾತ ಬಹುಭಾಷಾ ನಟಿ ವಿನ್ನಿ ಫರ್ನಾಂಡೀಸ್ (ವಿನ್ನಿ ಬಾಯಿ) ಅವರ ಐದನೇ ಪುಣ್ಯತಿಥಿ ಅಂಗವಾಗಿ ಜುಲೈ 29ರಂದು ಕುಲಶೇಖರ ಚರ್ಚ್ನಲ್ಲಿ IWIL Productions ವತಿಯಿಂದ ಸ್ಮರಣಾಂಜಲಿ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ಅವರ ಪುತ್ರ ಹಾಗೂ ನಿರ್ಮಾಪಕ-ಚಲನಚಿತ್ರ ನಿರ್ದೇಶಕ ವಿಲ್ಫ್ರೆಡ್ ಫರ್ನಾಂಡೀಸ್ ತಿಳಿಸಿದರು.
ನಗರದ ಪತ್ರಿಕಾ ಭವನದಲ್ಲಿ ಸೋಮವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ವಿನ್ನಿ ಫರ್ನಾಂಡೀಸ್ ಅವರು ಏಳು ಭಾಷೆಗಳಲ್ಲಿ 90ಕ್ಕೂ ಅಧಿಕ ನಾಟಕ, ದೂರದರ್ಶನ ಹಾಗೂ ಚಲನಚಿತ್ರ ನಿರ್ಮಾಣಗಳಲ್ಲಿ ಅಭಿನಯಿಸಿ, ವಿವಿಧ ನಿರ್ವಹಣಾ ಹೊಣೆಗಾರಿಕೆಗಳನ್ನು ಯಶಸ್ವಿಯಾಗಿ ನಿರ್ವಹಿಸಿದ್ದರು. ರಂಗಭೂಮಿ, ದೂರದರ್ಶನ, ಸಿನಿಮಾ, ಸಂಗೀತ ಹಾಗೂ ಸಾಂಸ್ಕೃತಿಕ ಕ್ಷೇತ್ರಗಳಿಗೆ ಅವರು ನೀಡಿದ ಕೊಡುಗೆ ಅಪಾರವಾಗಿದೆ. ಬಹುಮುಖ ಪ್ರತಿಭೆ, ಹಾಸ್ಯಪ್ರಜ್ಞೆ ಹಾಗೂ ಪ್ರೇಕ್ಷಕರೊಂದಿಗೆ ಬೆಸೆದುಕೊಳ್ಳುವ ವಿಶಿಷ್ಟ ಸಾಮರ್ಥ್ಯದಿಂದ ಅವರು ‘ನವರಸ ಕಲಾವಿದೆ’, ‘ಕಾಮಿಡಿ ಕ್ವೀನ್’, ‘ಕರಾವಳಿ ಮುತ್ತು’ ಮತ್ತು ‘ಅಭಿನಯ ಚತುರೆ’ ಸೇರಿದಂತೆ ಹಲವು ಗೌರವ ಬಿರುದುಗಳಿಗೆ ಪಾತ್ರರಾಗಿದ್ದರು ಎಂದರು.
2009ರಲ್ಲಿ ಮಾಂಡ್ ಸೊಭಾಣ್ ನೀಡಿದ ಅತ್ಯುತ್ತಮ ಕೊಂಕಣಿ ವ್ಯಕ್ತಿತ್ವ ಪ್ರಶಸ್ತಿ, 2015-16ರ ರಾಣಿ ಅಬ್ಬಕ್ಕ ಪ್ರಶಸ್ತಿ ಹಾಗೂ 2017-18ರ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಸೇರಿದಂತೆ ಹಲವು ಪ್ರತಿಷ್ಠಿತ ಗೌರವಗಳು ಅವರಿಗೆ ಸಂದಿದ್ದವು ಎಂದು ಹೇಳಿದರು.
ಕಲಾ ಕ್ಷೇತ್ರದ ಜೊತೆಗೆ ಲಯನ್ಸ್ ಕ್ಲಬ್ ಮೂಲಕ ಸಮಾಜಸೇವೆಗೂ ಅವರು ತಮ್ಮನ್ನು ಸಮರ್ಪಿಸಿಕೊಂಡಿದ್ದರು. ಡಿಸ್ಟ್ರಿಕ್ಟ್ ಲಯನ್ಸ್ ಮ್ಯೂಸಿಕ್ ಅಕಾಡೆಮಿಯ ಅಧ್ಯಕ್ಷೆಯಾಗಿಯೂ ಸೇವೆ ಸಲ್ಲಿಸಿದ್ದ ಅವರು, ತಮ್ಮ ಪ್ರತಿಭೆಯ ಮೂಲಕ ಸಮಾಜದಲ್ಲಿ ಸಂತೋಷ ಮತ್ತು ಸ್ಫೂರ್ತಿ ಮೂಡಿಸಿದ ವ್ಯಕ್ತಿತ್ವವಾಗಿದ್ದರು ಎಂದು ಸ್ಮರಿಸಿದರು.
ಆಸ್ಟ್ರೇಲಿಯಾದ ಮೆಲ್ಬರ್ನ್ ಹಾಗೂ ಭಾರತದ ಮುಂಬೈ ಕೇಂದ್ರಗಳಿಂದ ಕಾರ್ಯನಿರ್ವಹಿಸುತ್ತಿರುವ IWIL Productions ಮೂಲಕ ತಮ್ಮ ತಾಯಿಯ ಸೃಜನಾತ್ಮಕ ಪರಂಪರೆಯನ್ನು ಮುಂದುವರಿಸುತ್ತಿರುವುದಾಗಿ ತಿಳಿಸಿದ ವಿಲ್ಫ್ರೆಡ್ ಫರ್ನಾಂಡೀಸ್, “ನನ್ನ ತಾಯಿ ನನ್ನ ಬದುಕಿನ ಅತಿದೊಡ್ಡ ಪ್ರೇರಣೆ. ಸೃಜನಶೀಲತೆ, ಶಿಸ್ತು, ಧೈರ್ಯ ಮತ್ತು ಸಮಾಜಸೇವೆಯ ಮೌಲ್ಯಗಳನ್ನು ಅವರು ನನಗೆ ಕಲಿಸಿಕೊಟ್ಟಿದ್ದಾರೆ. ಆ ಚಿಂತನೆಗಳನ್ನು ಮುಂದುವರಿಸುವ ಉದ್ದೇಶದಿಂದ IWIL Productions ಮೂಲಕ ಹೊಸ ಪ್ರತಿಭೆಗಳಿಗೆ ಅವಕಾಶ ಕಲ್ಪಿಸಲಾಗುತ್ತಿದೆ” ಎಂದು ಹೇಳಿದರು.
IWIL Productions ಚಲನಚಿತ್ರಗಳು, ವೆಬ್ ಸರಣಿಗಳು, ಕಿರುಚಿತ್ರಗಳು, ಜಾಹೀರಾತುಗಳು ಹಾಗೂ ಅಂತರರಾಷ್ಟ್ರೀಯ ಮನರಂಜನಾ ಯೋಜನೆಗಳನ್ನು ನಿರ್ಮಿಸುವುದರ ಜೊತೆಗೆ ಆಸ್ಟ್ರೇಲಿಯಾ ಮತ್ತು ಭಾರತದ ಚಿತ್ರರಂಗಗಳ ನಡುವೆ ಸೃಜನಾತ್ಮಕ ಸಹಕಾರವನ್ನು ಮತ್ತಷ್ಟು ಬಲಪಡಿಸುತ್ತಿದೆ ಎಂದರು.
ಸುದ್ದಿಗೋಷ್ಠಿಯಲ್ಲಿ ವಿಲ್ಸನ್ ಫರ್ನಾಂಡೀಸ್, ಧೀರಜ್, ಸೋನಿಯಾ ಹಾಗೂ ರೋನಕ್ ಉಪಸ್ಥಿತರಿದ್ದರು.
