ಮಂಗಳೂರು: ಖ್ಯಾತ ಬಹುಭಾಷಾ ನಟಿ ವಿನ್ನಿ ಫರ್ನಾಂಡೀಸ್ (ವಿನ್ನಿ ಬಾಯಿ) ಅವರ ಐದನೇ ಪುಣ್ಯಸ್ಮರಣೆ ಅಂಗವಾಗಿ ಇಂದು (ಜುಲೈ 29) ಮಂಗಳೂರಿನ ಕುಲಶೇಖರ ಚರ್ಚ್ನಲ್ಲಿ IWIL Productions ವತಿಯಿಂದ ಸ್ಮರಣಾ ಕಾರ್ಯಕ್ರಮ ಆಯೋಜಿಸಲಾಗಿದೆ ಎಂದು ಅವರ ಪುತ್ರ, ನಿರ್ಮಾಪಕ ಹಾಗೂ ಚಲನಚಿತ್ರ ನಿರ್ದೇಶಕ ವಿಲ್ಫ್ರೆಡ್ ಫರ್ನಾಂಡೀಸ್ ತಿಳಿಸಿದ್ದಾರೆ.
ನಗರದ ಪತ್ರಿಕಾಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ವಿನ್ನಿ ಫರ್ನಾಂಡೀಸ್ ಅವರು ಏಳು ಭಾಷೆಗಳ 90ಕ್ಕೂ ಹೆಚ್ಚು ನಾಟಕ, ದೂರದರ್ಶನ ಹಾಗೂ ಚಲನಚಿತ್ರ ನಿರ್ಮಾಣಗಳಲ್ಲಿ ಅಭಿನಯಿಸಿ, ನಿರ್ವಹಣಾ ಹೊಣೆಗಾರಿಕೆಯನ್ನೂ ಯಶಸ್ವಿಯಾಗಿ ನಿರ್ವಹಿಸಿದ್ದರು. ರಂಗಭೂಮಿ, ದೂರದರ್ಶನ, ಚಲನಚಿತ್ರ, ಸಂಗೀತ ಹಾಗೂ ಸಾಂಸ್ಕೃತಿಕ ಕ್ಷೇತ್ರಗಳಿಗೆ ಅವರು ನೀಡಿದ ಅಪಾರ ಕೊಡುಗೆಗಾಗಿ ‘ನವರಸ ಕಲಾವಿದೆ’, ‘ಕಾಮಿಡಿ ಕ್ವೀನ್’, ‘ಕರಾವಳಿ ಮುತ್ತು’ ಮತ್ತು ‘ಅಭಿನಯ ಚತುರೆ’ ಸೇರಿದಂತೆ ಹಲವು ಗೌರವ ಬಿರುದುಗಳನ್ನು ಪಡೆದಿದ್ದರು ಎಂದು ಹೇಳಿದರು.
2009ರ ‘ಅತ್ಯುತ್ತಮ ಕೊಂಕಣಿ ವ್ಯಕ್ತಿತ್ವ ಪ್ರಶಸ್ತಿ’, 2015–16ರ ‘ರಾಣಿ ಅಬ್ಬಕ್ಕ ಪ್ರಶಸ್ತಿ’ ಹಾಗೂ 2017–18ರ ‘ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ’ ಸೇರಿದಂತೆ ಹಲವು ಪ್ರತಿಷ್ಠಿತ ಗೌರವಗಳು ಅವರಿಗೆ ಲಭಿಸಿದ್ದವು. ಕಲಾ ಕ್ಷೇತ್ರದ ಜೊತೆಗೆ ಲಯನ್ಸ್ ಕ್ಲಬ್ ಮೂಲಕ ಸಮಾಜಸೇವೆಯಲ್ಲೂ ಸಕ್ರಿಯರಾಗಿದ್ದ ಅವರು, ಡಿಸ್ಟ್ರಿಕ್ಟ್ ಲಯನ್ಸ್ ಮ್ಯೂಸಿಕ್ ಅಕಾಡೆಮಿಯ ಅಧ್ಯಕ್ಷೆಯಾಗಿಯೂ ಸೇವೆ ಸಲ್ಲಿಸಿದ್ದರು.
ಆಸ್ಟ್ರೇಲಿಯಾದ ಮೆಲ್ಬರ್ನ್ ಮತ್ತು ಮುಂಬೈ ಕೇಂದ್ರಗಳಿಂದ ಕಾರ್ಯನಿರ್ವಹಿಸುತ್ತಿರುವ IWIL Productions ಮೂಲಕ ತಾಯಿಯ ಕಲಾತ್ಮಕ ಪರಂಪರೆಯನ್ನು ಮುಂದುವರಿಸುತ್ತಿರುವುದಾಗಿ ವಿಲ್ಫ್ರೆಡ್ ಫರ್ನಾಂಡೀಸ್ ತಿಳಿಸಿದರು. ಚಲನಚಿತ್ರ, ವೆಬ್ ಸರಣಿಗಳು, ಕಿರುಚಿತ್ರಗಳು, ಜಾಹೀರಾತುಗಳು ಹಾಗೂ ಅಂತರರಾಷ್ಟ್ರೀಯ ಮನರಂಜನಾ ಯೋಜನೆಗಳ ಮೂಲಕ ಭಾರತ ಮತ್ತು ಆಸ್ಟ್ರೇಲಿಯಾ ಚಿತ್ರರಂಗಗಳ ನಡುವಿನ ಸೃಜನಾತ್ಮಕ ಸಂಪರ್ಕವನ್ನು ಮತ್ತಷ್ಟು ಬಲಪಡಿಸುವ ಕಾರ್ಯವನ್ನು ಸಂಸ್ಥೆ ಕೈಗೊಂಡಿದೆ ಎಂದರು.
ಸುದ್ದಿಗೋಷ್ಠಿಯಲ್ಲಿ ವಿಲ್ಸನ್ ಫರ್ನಾಂಡೀಸ್, ಧೀರಜ್, ಸೋನಿಯಾ ಹಾಗೂ ರೋನಕ್ ಉಪಸ್ಥಿತರಿದ್ದರು.
