ಅಜ್ಮಾನ್: ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿ (GMU) 2026–27ನೇ ಸಾಲಿನ ಶೈಕ್ಷಣಿಕ ವರ್ಷವನ್ನು ಸೋಮವಾರ (ಆ.31) ಅಧಿಕೃತವಾಗಿ ಆರಂಭಿಸಿದ್ದು, ವಿದ್ಯಾರ್ಥಿಗಳು ಹಾಗೂ ಬೋಧಕ ಸಿಬ್ಬಂದಿಯನ್ನು ಹೊಸ ಶೈಕ್ಷಣಿಕ ವರ್ಷದ ಕಲಿಕೆ, ಸಂಶೋಧನೆ, ನವೋದ್ಯಮ ಮತ್ತು ಆರೋಗ್ಯ ವೃತ್ತಿಪರ ಶಿಕ್ಷಣದ ಉನ್ನತಿಯತ್ತ ಬರಮಾಡಿಕೊಂಡಿತು.
ಹೊಸ ಶೈಕ್ಷಣಿಕ ವರ್ಷದ ಆರಂಭದೊಂದಿಗೆ ವಿಶ್ವವಿದ್ಯಾಲಯದ ಆವರಣದಲ್ಲಿ ವಿದ್ಯಾರ್ಥಿಗಳ ಸಂಖ್ಯೆಯಲ್ಲಿ ಗಮನಾರ್ಹ ಏರಿಕೆ ಕಂಡುಬಂದಿದ್ದು, GMUಯ ಆರೋಗ್ಯ ವೃತ್ತಿಪರ ಶಿಕ್ಷಣದ ವಿವಿಧ ಕೋರ್ಸ್ಗಳಿಗೆ ಇರುವ ಬೇಡಿಕೆಯನ್ನು ಇದು ಪ್ರತಿಬಿಂಬಿಸಿದೆ.
“2026–27ನೇ ಸಾಲಿಗೆ ವಿದ್ಯಾರ್ಥಿಗಳು ಮತ್ತು ಬೋಧಕ ಸಿಬ್ಬಂದಿಯನ್ನು ಸ್ವಾಗತಿಸುತ್ತಿರುವ ಸಂದರ್ಭದಲ್ಲಿ ಶೈಕ್ಷಣಿಕ ಶ್ರೇಷ್ಠತೆಯನ್ನು ಮತ್ತಷ್ಟು ವಿಸ್ತರಿಸುವುದು, ಸಂಶೋಧನೆ ಮತ್ತು ನವೋದ್ಯಮವನ್ನು ಬಲಪಡಿಸುವುದು ಹಾಗೂ ಸ್ಥಳೀಯ ಮತ್ತು ಜಾಗತಿಕ ಮಟ್ಟದಲ್ಲಿ ಬದಲಾಗುತ್ತಿರುವ ಆರೋಗ್ಯ ಕ್ಷೇತ್ರದ ಅಗತ್ಯಗಳಿಗೆ ಸ್ಪಂದಿಸುವ ಸಾಮರ್ಥ್ಯ ಹೊಂದಿರುವ ಆರೋಗ್ಯ ವೃತ್ತಿಪರರನ್ನು ರೂಪಿಸುವುದು ನಮ್ಮ ಪ್ರಮುಖ ಗುರಿಯಾಗಿದೆ. ಇತ್ತೀಚಿನ ಅಂತಾರಾಷ್ಟ್ರೀಯ ಮಾನ್ಯತೆಗಳು GMUಯಲ್ಲಿ ನಡೆಯುತ್ತಿರುವ ಗುಣಮಟ್ಟದ ಕಾರ್ಯಕ್ಕೆ ಮತ್ತಷ್ಟು ದೃಢತೆ ನೀಡಿದ್ದು, ಮುಂದಿನ ಸಾಧನೆಗಳಿಗೆ ಹೆಚ್ಚಿನ ಮಾನದಂಡವನ್ನು ನಿಗದಿಪಡಿಸಿವೆ” ಎಂದು ಗಲ್ಫ್ ಮೆಡಿಕಲ್ ಯೂನಿವರ್ಸಿಟಿಯ ಕುಲಪತಿ ಪ್ರೊ. ಮಂದಾ ವೆಂಕಟ್ರಮಣ ಹೇಳಿದರು.
1998ರಲ್ಲಿ ತುಂಬೆ ಗ್ರೂಪ್ನ ಸಂಸ್ಥಾಪಕ ಅಧ್ಯಕ್ಷ ಡಾ. ತುಂಬೆ ಮೊಯ್ದೀನ್ ಅವರಿಂದ ಸ್ಥಾಪನೆಯಾದ ಗಲ್ಫ್ ಮೆಡಿಕಲ್ ಕಾಲೇಜು, ಬಳಿಕ ಸಮಗ್ರ ವಿಶ್ವವಿದ್ಯಾಲಯವಾಗಿ ಅಭಿವೃದ್ಧಿಗೊಂಡಿದ್ದು, ಶಿಕ್ಷಣ, ಆರೋಗ್ಯ ಸೇವೆ ಮತ್ತು ಸಂಶೋಧನೆಯನ್ನು ಒಳಗೊಂಡ ಸಮಗ್ರ ಅಕಾಡೆಮಿಕ್ ಹೆಲ್ತ್ ಸಿಸ್ಟಂ ಆಗಿ ರೂಪುಗೊಂಡಿದೆ.
ಶೈಕ್ಷಣಿಕ ವರ್ಷದ ಉದ್ಘಾಟನಾ ಸಂದರ್ಭದಲ್ಲಿ ವಿಶ್ವವಿದ್ಯಾಲಯದ ಆಡಳಿತ ಮಂಡಳಿ, ವಿವಿಧ ಕಾಲೇಜುಗಳ ಡೀನ್ಗಳು ಹಾಗೂ ಮುಖ್ಯಸ್ಥರ ನಡುವೆ ಸಭೆಗಳು ಮತ್ತು ಸಂವಾದಗಳು ನಡೆದವು. ಮುಂದಿನ ಶೈಕ್ಷಣಿಕ ವರ್ಷದ ಆದ್ಯತೆಗಳು ಹಾಗೂ ಕಾರ್ಯಯೋಜನೆಗಳ ಕುರಿತು ಚರ್ಚಿಸಲಾಯಿತು. ಡಾ. ತುಂಬೆ ಮೊಯ್ದೀನ್ ಅವರು ವಿವಿಧ ಕಾಲೇಜುಗಳ ಡೀನ್ಗಳೊಂದಿಗೆ ಸಭೆ ನಡೆಸಿದರೆ, ಉಪಕುಲಪತಿ ಹಾಗೂ ಕಾಲೇಜು ಮುಖ್ಯಸ್ಥರು ಶೈಕ್ಷಣಿಕ ಆದ್ಯತೆಗಳು ಮತ್ತು ಯೋಜನೆಗಳನ್ನು ಪರಿಶೀಲಿಸಿದರು.
2026–27ನೇ ಶೈಕ್ಷಣಿಕ ವರ್ಷದಲ್ಲಿ ಉನ್ನತ ಮಟ್ಟದ ಆರೋಗ್ಯ ವಿಜ್ಞಾನ ಮತ್ತು ಮೂಲ ವೈದ್ಯಕೀಯ ಶಿಕ್ಷಣವನ್ನು ಮತ್ತಷ್ಟು ಬಲಪಡಿಸುವುದರ ಜೊತೆಗೆ ಡಿಜಿಟಲ್ ಹೆಲ್ತ್, ಅಂತರಶಿಸ್ತೀಯ ಕಲಿಕೆ, ಸಂಶೋಧನೆ ಮತ್ತು ನವೋದ್ಯಮ ಕ್ಷೇತ್ರಗಳಿಗೆ ಹೆಚ್ಚಿನ ಒತ್ತು ನೀಡಲು ವಿಶ್ವವಿದ್ಯಾಲಯ ನಿರ್ಧರಿಸಿದೆ. ಜಾಗತಿಕ ಆರೋಗ್ಯ ಕ್ಷೇತ್ರದ ಬದಲಾಗುತ್ತಿರುವ ಅಗತ್ಯಗಳಿಗೆ ತಕ್ಕಂತೆ ವಿದ್ಯಾರ್ಥಿಗಳನ್ನು ಸಜ್ಜುಗೊಳಿಸುವ ಬಹುಶಿಸ್ತೀಯ ಶೈಕ್ಷಣಿಕ ವಾತಾವರಣವನ್ನು GMU ಮುಂದುವರಿಸಿದೆ.
ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಗಮನಾರ್ಹ ಸಾಧನೆ
ಹೊಸ ಶೈಕ್ಷಣಿಕ ವರ್ಷ ಆರಂಭವಾಗುತ್ತಿರುವ ಸಂದರ್ಭದಲ್ಲಿ GMU ಇತ್ತೀಚೆಗೆ ಪಡೆದಿರುವ ಅಂತಾರಾಷ್ಟ್ರೀಯ ಮಾನ್ಯತೆಗಳು ವಿಶ್ವವಿದ್ಯಾಲಯದ ಸಾಧನೆಗೆ ಮತ್ತಷ್ಟು ಮೆರುಗು ತಂದಿವೆ. 2026ರ ಜೂನ್ನಲ್ಲಿ ಯುನೈಟೆಡ್ ಕಿಂಗ್ಡಮ್ನ ಕ್ವಾಲಿಟಿ ಅಶ್ಯುರೆನ್ಸ್ ಏಜೆನ್ಸಿ ಫಾರ್ ಹೈಯರ್ ಎಜುಕೇಶನ್ (QAA) ಸಂಸ್ಥೆಯಿಂದ GMUಗೆ ಸಾಂಸ್ಥಿಕ ಮಾನ್ಯತೆ ದೊರೆತಿದೆ. ಸಮಗ್ರ ಅಂತಾರಾಷ್ಟ್ರೀಯ ಗುಣಮಟ್ಟ ಪರಿಶೀಲನೆಯ ಬಳಿಕ ದೊರೆತ ಈ ಮಾನ್ಯತೆ 2031ರವರೆಗೆ ಜಾರಿಯಲ್ಲಿರಲಿದೆ.
ಪರಿಶೀಲನೆಯ ವೇಳೆ ಯುರೋಪಿಯನ್ ಹೈಯರ್ ಎಜುಕೇಶನ್ ಏರಿಯಾದ ಗುಣಮಟ್ಟ ಖಾತರಿ ವ್ಯವಸ್ಥೆಯ 10 ಯುರೋಪಿಯನ್ ಮಾನದಂಡಗಳು ಮತ್ತು ಮಾರ್ಗಸೂಚಿಗಳನ್ನು GMU ಯಾವುದೇ ಷರತ್ತುಗಳಿಲ್ಲದೆ ಪೂರೈಸಿರುವುದು ದೃಢಪಟ್ಟಿದೆ.
ಇದೇ ವೇಳೆ Times Higher Education (THE) Sustainability Impact Rankings 2026ರಲ್ಲಿ GMU ಜಾಗತಿಕ 301–400ರ ಶ್ರೇಣಿ ಕಾಯ್ದುಕೊಂಡಿದೆ. ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿ ಗುರಿಗಳಲ್ಲಿಯೂ ವಿಶ್ವವಿದ್ಯಾಲಯ ಗಮನಾರ್ಹ ಸಾಧನೆ ಮಾಡಿದ್ದು, ‘ಅಸಮಾನತೆ ಕಡಿತ’ ವಿಭಾಗದಲ್ಲಿ ಜಾಗತಿಕವಾಗಿ 23ನೇ ಸ್ಥಾನ, ‘ಗುಣಮಟ್ಟದ ಶಿಕ್ಷಣ’ದಲ್ಲಿ 60ನೇ ಸ್ಥಾನ ಹಾಗೂ ‘ಉತ್ತಮ ಆರೋಗ್ಯ ಮತ್ತು ಕಲ್ಯಾಣ’ ವಿಭಾಗದಲ್ಲಿ 64ನೇ ಸ್ಥಾನ ಪಡೆದಿದೆ.
7 ಕಾಲೇಜುಗಳು, 45 ಮಾನ್ಯತೆ ಪಡೆದ ಕೋರ್ಸ್ಗಳು
ಪ್ರಸ್ತುತ GMUಯಲ್ಲಿ ಮೆಡಿಸಿನ್, ಡೆಂಟಿಸ್ಟ್ರಿ, ಹೆಲ್ತ್ ಸೈನ್ಸಸ್, ಫಾರ್ಮಸಿ, ನರ್ಸಿಂಗ್, ಹೆಲ್ತ್ಕೇರ್ ಮ್ಯಾನೇಜ್ಮೆಂಟ್ ಆ್ಯಂಡ್ ಎಕನಾಮಿಕ್ಸ್ ಹಾಗೂ ನೂತನವಾಗಿ ಸೇರ್ಪಡೆಗೊಂಡಿರುವ ತುಂಬೆ ಕಾಲೇಜ್ ಆಫ್ ಮ್ಯಾನೇಜ್ಮೆಂಟ್ ಆ್ಯಂಡ್ AI ಇನ್ ಹೆಲ್ತ್ಕೇರ್ ಸೇರಿದಂತೆ ಒಟ್ಟು ಏಳು ಕಾಲೇಜುಗಳಿವೆ.
ವಿಶ್ವವಿದ್ಯಾಲಯದಲ್ಲಿ 45 ಮಾನ್ಯತೆ ಪಡೆದ ಶೈಕ್ಷಣಿಕ ಕಾರ್ಯಕ್ರಮಗಳಿದ್ದು, ಇದುವರೆಗೆ 5,000ಕ್ಕೂ ಅಧಿಕ ವಿದ್ಯಾರ್ಥಿಗಳು ಪದವಿ ಪಡೆದಿದ್ದಾರೆ. 111ಕ್ಕೂ ಅಧಿಕ ದೇಶಗಳ ವಿದ್ಯಾರ್ಥಿಗಳು ಇಲ್ಲಿ ಶಿಕ್ಷಣ ಪಡೆಯುತ್ತಿದ್ದು, 56 ದೇಶಗಳ ಬೋಧಕ ಸಿಬ್ಬಂದಿ ಸೇವೆ ಸಲ್ಲಿಸುತ್ತಿದ್ದಾರೆ.
ವಿದ್ಯಾರ್ಥಿಗಳ ಕ್ಲಿನಿಕಲ್ ತರಬೇತಿಗಾಗಿ ತುಂಬೆ ಗ್ರೂಪ್ನ ಏಳು ಅಕಾಡೆಮಿಕ್ ಆಸ್ಪತ್ರೆಗಳ ಜಾಲದ ಮೂಲಕ 3,100ಕ್ಕೂ ಅಧಿಕ ತರಬೇತಿ ಹಾಸಿಗೆಗಳ ವ್ಯವಸ್ಥೆ ಮಾಡಲಾಗಿದೆ. ಅಲ್ಲದೆ, 75ಕ್ಕೂ ಅಧಿಕ ಅಂತಾರಾಷ್ಟ್ರೀಯ ವಿಶ್ವವಿದ್ಯಾಲಯಗಳೊಂದಿಗೆ GMU ಶೈಕ್ಷಣಿಕ ಸಹಭಾಗಿತ್ವ ಹೊಂದಿದೆ.
ಪ್ರದೇಶದಲ್ಲೇ ಖಾಸಗಿ ವಲಯದ ವಿಶಿಷ್ಟ ಅಕಾಡೆಮಿಕ್ ಹೆಲ್ತ್ ಸಿಸ್ಟಂ ಆಗಿ ಗುರುತಿಸಿಕೊಂಡಿರುವ GMU, 2025ರ Times Higher Education Impact Rankingsನಲ್ಲಿ ‘ಉತ್ತಮ ಆರೋಗ್ಯ ಮತ್ತು ಕಲ್ಯಾಣ’ ವಿಭಾಗದಲ್ಲಿ ಯುಎಇ ವಿಶ್ವವಿದ್ಯಾಲಯಗಳ ಪೈಕಿ ಪ್ರಥಮ ಸ್ಥಾನ ಪಡೆದಿತ್ತು.
ವಿದ್ಯಾರ್ಥಿಗಳು ಹೊಸ ಶೈಕ್ಷಣಿಕ ವರ್ಷದ ಪ್ರಯಾಣ ಆರಂಭಿಸಿರುವ ಹಿನ್ನೆಲೆಯಲ್ಲಿ, ಭವಿಷ್ಯದ ಆರೋಗ್ಯ ವೃತ್ತಿಪರರು ಕಲಿಕೆ, ಸಂಶೋಧನೆ, ನವೋದ್ಯಮ ಮತ್ತು ಸಮಾಜಮುಖಿ ಸೇವೆಗಳ ಮೂಲಕ ಜಾಗತಿಕ ಆರೋಗ್ಯ ಕ್ಷೇತ್ರಕ್ಕೆ ಮಹತ್ವದ ಕೊಡುಗೆ ನೀಡುವಂತಹ ಶೈಕ್ಷಣಿಕ ವಾತಾವರಣ ನಿರ್ಮಿಸುವತ್ತ GMU ತನ್ನ ಗಮನವನ್ನು ಮುಂದುವರಿಸಿದೆ.
