ಕುಂಬಳೆ : ಕಾರಿನಲ್ಲಿ ಮಾದಕವಸ್ತುಗಳನ್ನು ಅಡಗಿಸಿಟ್ಟು ತನ್ನನ್ನು ಪ್ರಕರಣದಲ್ಲಿ ಸಿಲುಕಿಸಲು ಹಾಗೂ ವ್ಯಕ್ತಿತ್ವಕ್ಕೆ ಧಕ್ಕೆ ತರಲು ಪೈವಳಿಕೆ ಪಂಚಾಯತ್ ಸದಸ್ಯ ಝಕರಿಯ್ಯ ಅಲಿಯಾಸ್ ಜೆಕ್ಕಿ ಪ್ರಯತ್ನಿಸುತ್ತಿದ್ದಾರೆ ಎಂದು ಚಿಪ್ಪಾರ್ ನಿವಾಸಿ ಉಮ್ಮರ್ ಫಾರೂಖ್ ಆರೋಪಿಸಿದ್ದಾರೆ.ಕುಂಬಳೆಪ್ರೆಸ್ ಫೋರಂನಲ್ಲಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಅವರು ಈ ಆರೋಪ ಮಾಡಿದ್ದಾರೆ.
ತಮ್ಮ ಮಾಲೀಕತ್ವದ ಆಲ್ಟೋ ಕಾರು (KL 14 AE 1898)ನಲ್ಲಿ ಮಾದಕವಸ್ತುಗಳಿವೆ ಎಂದು ಆರೋಪಿಸಿ ಪೊಲೀಸರಿಗೆ ಪದೇಪದೇ ಸುಳ್ಳು ದೂರುಗಳನ್ನು ನೀಡಿ, ವಾಹನವನ್ನು ಪರಿಶೀಲನೆಗೊಳಪಡಿಸಲಾಗುತ್ತಿದೆ. ಈ ಮೂಲಕ ತಮಗೆ ಮಾನಸಿಕ ಕಿರುಕುಳ ನೀಡಲಾಗುತ್ತಿದೆ ಎಂದು ಉಮ್ಮರ್ ಫಾರೂಖ್ ಹೇಳಿದ್ದಾರೆ.
ಗಲ್ಫ್ ದೇಶಗಳ ನಂಬರ್ಗಳಿಂದ ಜನರಿಗೆ ಕರೆ ಮಾಡಿಸಿ, ಕೇರಳ ಹಾಗೂ ಕರ್ನಾಟಕ ಪೊಲೀಸರಿಗೆ ತಪ್ಪು ಮಾಹಿತಿಗಳನ್ನು ನೀಡಿ ತಮ್ಮನ್ನು ಬೇಟೆಯಾಡಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.
ತಮ್ಮ ಕಾರಿನಲ್ಲಿ ಮಾದಕವಸ್ತುಗಳನ್ನು ಅಡಗಿಸಿಡಲು ಪೆರುವಾಡಿ ನಿವಾಸಿ ಅಜೀಜ್ ಎಂಬಾತನನ್ನು ಝಕರಿಯ್ಯ ಕಳುಹಿಸಿದ್ದರು. ಈ ವಿಚಾರವನ್ನು ಅಜೀಜ್ ಸ್ವತಃ ತಮ್ಮ ಬಳಿ ಹೇಳಿಕೊಂಡಿದ್ದಾನೆ ಎಂದು ಉಮ್ಮರ್ ಫಾರೂಖ್ ಆರೋಪಿಸಿದ್ದಾರೆ.
ತಮ್ಮನ್ನು ಮಾದಕವಸ್ತು ವ್ಯಾಪಾರಿ ಎಂದು ಬಿಂಬಿಸಿ, ಸ್ಥಳೀಯರು ಹಾಗೂ ಸಂಬಂಧಿಕರ ಮುಂದೆ ಅವಮಾನಿಸುವ ಉದ್ದೇಶದಿಂದ ವ್ಯವಸ್ಥಿತ ಸಂಚು ನಡೆಯುತ್ತಿದೆ ಎಂದು ಅವರು ಹೇಳಿದ್ದಾರೆ.
ತಾವು ಕಾನೂನುಬದ್ಧವಾಗಿ ವ್ಯಾಪಾರ ನಡೆಸುತ್ತಿದ್ದು, ಈವರೆಗೆ ತಮ್ಮಿಂದ ಯಾವುದೇ ಕಾನೂನುಬಾಹಿರ ಚಟುವಟಿಕೆ ನಡೆದಿರುವುದು ಕೇರಳ ಅಥವಾ ಕರ್ನಾಟಕ ಪೊಲೀಸರಿಗೆ ಪತ್ತೆಯಾಗಿಲ್ಲ ಎಂದು ಉಮ್ಮರ್ ಫಾರೂಖ್ ತಿಳಿಸಿದ್ದಾರೆ.
ಝಕರಿಯ್ಯ ಅವರ ಅಕ್ರಮ ಮರಳು ಸಾಗಾಟವನ್ನು ಕರ್ನಾಟಕ ಪೊಲೀಸರು ಹಿಡಿದು, ವಾಹನಗಳು ಹಾಗೂ ಯಂತ್ರೋಪಕರಣಗಳನ್ನು ವಶಪಡಿಸಿಕೊಂಡಿದ್ದ ಪ್ರಕರಣದಲ್ಲಿ ದೂರು ನೀಡಿದ್ದು ತಾನೇ ಎಂದು ತಪ್ಪಾಗಿ ಭಾವಿಸಿ, ತಮ್ಮನ್ನು ಪ್ರಕರಣದಲ್ಲಿ ಸಿಲುಕಿಸಲು ಪ್ರಯತ್ನಿಸಲಾಗುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.
ತಮ್ಮ ಜೀವಕ್ಕೆ ಬೆದರಿಕೆ ಇದ್ದು, ರಾಜಕೀಯವಾಗಿಯೂ ತಮ್ಮನ್ನು ಬೇಟೆಯಾಡಲಾಗುತ್ತಿದೆ ಎಂದು ಉಮ್ಮರ್ ಫಾರೂಖ್ ಹೇಳಿದ್ದಾರೆ.
ಈ ಕುರಿತು ಸಮಗ್ರ ತನಿಖೆ ನಡೆಸಿ, ತಪ್ಪಿತಸ್ಥರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿ ಉಮ್ಮರ್ ಫಾರೂಖ್ ಕಾಸರಗೋಡು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗೆ ದೂರು ಸಲ್ಲಿಸಿದ್ದಾರೆ.
