ಮಂಜೇಶ್ವರದಲ್ಲಿ ವ್ಯಾಪಾರಿ ಮೇಲೆ ಗುಂಡಿನ ದಾಳಿ; ‘ವೆಡಿ ಸಫ್ವಾನ್’ ಪೊಲೀಸ್ ವಶಕ್ಕೆ

ಮಂಜೇಶ್ವರ: ಮಂಜೇಶ್ವರ ಪೊಲೀಸ್ ಸ್ಟೇಷನ್ ವ್ಯಾಪ್ತಿಯ ಬಟ್ಟೆಪದವಿನಲ್ಲಿ ಅಂಗಡಿಗೆ ನುಗ್ಗಿ ಯುವ ವ್ಯಾಪಾರಿಯನ್ನು ಬಲವಂತವಾಗಿ ಕೊಲೆ ಮಾಡಲು ಯತ್ನಿಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಒಬ್ಬ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

​ಮಂಜೇಶ್ವರದ ಕುಳೂರು ಕನ್ನಿಲ್ ಹೌಸ್ ನಿವಾಸಿ ಮೊಹಮ್ಮದ್ ಸಫ್ವಾನ್ ಅಲಿಯಾಸ್ ‘ವೆಡಿ ಸಫ್ವಾನ್’ (28) ಬಂಧಿತ ಆರೋಪಿ. ಬಟ್ಟಿ ಪದವು ನಿವಾಸಿ ಶುವೈಬ್ ಮೊಯಿನ್ ಶೇಖ್ (28) ಮೇಲೆ ಈ ಮಾರಣಾಂತಿಕ ಹಲ್ಲೆ ಹಾಗೂ ವಧೆ ಯತ್ನ ನಡೆದಿತ್ತು.

​ಸೋಮವಾರ ಮಧ್ಯಾಹ್ನ ಕಾರಿನಲ್ಲಿ ಬಂದ ತಂಡವು ಶುವೈಬ್ ಅವರನ್ನು ಬೆದರಿಸಿ, ಮುಖಕ್ಕೆ ಹೊಡೆದು ಬಳಿಕ ಆಕಾಶಕ್ಕೆ ಗುಂಡು ಹಾರಿಸಿ ನಂತರ ಅವರ ಮೇಲೆಯೇ ಗುಂಡಿನ ದಾಳಿ ನಡೆಸಿತ್ತು.

ಅದೃಷ್ಟವಶಾತ್ ಶುವೈಬ್ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ. ಈ ಕೃತ್ಯದಲ್ಲಿ ಭಾಗಿಯಾದ ಖಾದರ್ ಮದಂಕಲ್ಲು, ಮಿಯಾಪದವು ರಹೀಮ್, ಅಬೂಬಕರ್ ಸಿದ್ದೀಕ್ ಹಾಗೂ ಇತರರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿ ತನಿಖೆ ಮುಂದುವರಿಸಿದ್ದಾರೆ.