ಅಮೆರಿಕ ಮತ್ತು ಇರಾನ್ ನಡುವಿನ ಕದನ ವಿರಾಮ (ಸೀಸ್ಫೈರ್) ಅಂತ್ಯಗೊಂಡಿದೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದಾರೆ. ಇರಾನ್ನೊಂದಿಗೆ ನಡೆಯುತ್ತಿರುವ ಮಾತುಕತೆಗಳು ಸಮಯ ವ್ಯರ್ಥ ಮಾಡುವುದಷ್ಟೇ ಎಂದು ಅವರು ಟೀಕಿಸಿದರು.
ಇರಾನ್ನ 85 ಗುರಿಗಳ ಮೇಲೆ ಅಮೆರಿಕ ದಾಳಿ ನಡೆಸಿದೆ ಎಂದು ಟ್ರಂಪ್ ತಿಳಿಸಿದ್ದಾರೆ. ಇರಾನ್ನವರನ್ನು ಉಲ್ಲೇಖಿಸಿ ಅವರು ತೀವ್ರ ಟೀಕೆಗಳನ್ನು ಮಾಡುತ್ತಾ, ಕಳೆದ ರಾತ್ರಿ “ಅತ್ಯಂತ ಅಪಾಯಕಾರಿ ವ್ಯಕ್ತಿಗಳ” ವಿರುದ್ಧ ಅಮೆರಿಕ ಬಲವಾದ ದಾಳಿ ನಡೆಸಿದೆ ಎಂದು ಹೇಳಿದ್ದಾರೆ. ಬುಧವಾರ ಅಂಕಾರಾದಲ್ಲಿ ನಡೆದ ನಾಟೋ (NATO) ಶೃಂಗಸಭೆಯಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡುವ ವೇಳೆ ಅವರು ಈ ಹೇಳಿಕೆ ನೀಡಿದ್ದಾರೆ.
ಹೋರ್ಮುಜ್ ಜಲಸಂಧಿಯ ಮೂಲಕ ಸಂಚರಿಸುತ್ತಿದ್ದ ಮೂರು ಹಡಗುಗಳ ಮೇಲೆ ದಾಳಿ ನಡೆದ ಹಿನ್ನೆಲೆಯಲ್ಲಿ ಅಮೆರಿಕ ಈ ಪ್ರತಿದಾಳಿ ನಡೆಸಿದೆ ಎಂದು ತಿಳಿಸಲಾಗಿದೆ. ಆ ಹಡಗುಗಳ ಮೇಲಿನ ದಾಳಿಯ ಹಿಂದೆ ಇರಾನ್ ಸೇನೆಯ ಕೈವಾಡವಿದೆ ಎಂದು ಅಮೆರಿಕ ಆರೋಪಿಸಿದೆ.
“ಕಳೆದ ರಾತ್ರಿ ನಾವು ಅತ್ಯಂತ ಅಪಾಯಕಾರಿ ಇರಾನಿ ಗುರಿಗಳ ಮೇಲೆ ಪ್ರಬಲ ದಾಳಿ ನಡೆಸಿದ್ದೇವೆ. ಅವರು ಅಪಾಯಕಾರಿ ಮನೋಭಾವ ಹೊಂದಿದ್ದಾರೆ,” ಎಂದು ಟ್ರಂಪ್ ಹೇಳಿದ್ದಾರೆ.
ಇನ್ನೂ ಮಾತನಾಡಿದ ಅವರು, “ನಾವು ಇರಾನ್ ಮೇಲೆ ಅತ್ಯಂತ ಬಲವಾಗಿ ಪ್ರಹಾರ ಮಾಡಿದ್ದೇವೆ. ಅವರು ಯಾವಾಗ ದಾಳಿ ನಡೆಸಿದರೂ ನಾವು ತಕ್ಕ ಪ್ರತಿದಾಳಿ ನೀಡುತ್ತೇವೆ ಎಂದು ಈಗಾಗಲೇ ತಿಳಿಸಿದ್ದೆವು. ಅವರು ನಿಯಮಗಳನ್ನು ಪಾಲಿಸುವುದಿಲ್ಲ. ಎಲ್ಲರನ್ನೂ ಗುರಿಯಾಗಿಸುತ್ತಾರೆ, ಬಹುಶಃ ನನ್ನನ್ನೂ ಸಹ. ನಮಗೆ ಅವರು ಇಷ್ಟವಿಲ್ಲ. ಅವರು ದುಷ್ಟರು. ನಮ್ಮ ಗುರಿ ಇರಾನ್ ಅನ್ನು ಅಣ್ವಸ್ತ್ರಮುಕ್ತ ರಾಷ್ಟ್ರವನ್ನಾಗಿ ಮಾಡುವುದು, ಅದನ್ನು ನಾವು ಸಾಧಿಸುತ್ತೇವೆ,” ಎಂದು ಹೇಳಿದ್ದಾರೆ.
