ಮಂಜೇಶ್ವರ: ತಾಯಿಯ ಮೇಲಿನ ಪ್ರೀತಿ, ಗೌರವ ಮತ್ತು ಆಕೆಗೆ ನೀಡಬೇಕಾದ ಸ್ಥಾನಮಾನದ ಕುರಿತು ಅತ್ಯಂತ ಪ್ರಬುದ್ಧವಾಗಿ ಹಾಗೂ ವಾಕ್ಚಾತುರ್ಯದಿಂದ ಮಾತನಾಡಿದ 10 ವರ್ಷದ ಬಾಲಕನೊಬ್ಬನ ಭಾಷಣದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ.
ಇಲ್ಲಿಗೆ ಸಮೀಪದ ಬಾಯಿಕಟ್ಟೆಯಲ್ಲಿ ಇತ್ತೀಚೆಗೆ ಆಯೋಜಿಸಲಾಗಿದ್ದ ‘ಮಿಲಾದುನ್ನಬಿ’ ಕಾರ್ಯಕ್ರಮದಲ್ಲಿ ಈ ದೃಶ್ಯ ಕಂಡುಬಂದಿದೆ. ಬಾಯಿಕಟ್ಟೆಯ ‘ಬದುರುಲ್ ಉಲೂಮ್ ಮದ್ರಸ’ದ 5ನೇ ತರಗತಿ ವಿದ್ಯಾರ್ಥಿ, ಸ್ಥಳೀಯ ನಿವಾಸಿ ಕರೀಂ ಎಂಬವರ ಪುತ್ರ ಮೊಹಮ್ಮದ್ ಅಬ್ದುಲ್ಲಾ ಈ ಅದ್ಭುತ ವಾಕ್ಚಾತುರ್ಯದ ಮೂಲಕ ಎಲ್ಲರ ಗಮನ ಸೆಳೆದ ಬಾಲಕ.
ಕಾರ್ಯಕ್ರಮದ ವೇದಿಕೆಯನ್ನೇರಿದ ಅಬ್ದುಲ್ಲಾ, “ತಾಯಂದಿರಿಗೆ ಮಕ್ಕಳು ನೀಡಬೇಕಾದ ಗೌರವ ಮತ್ತು ಕರ್ತವ್ಯಗಳು” ಎಂಬ ವಿಷಯದ ಕುರಿತು ಅತ್ಯಂತ ಸ್ಪಷ್ಟ ಧ್ವನಿಯಲ್ಲಿ ಹಾಗೂ ಭಾವಪೂರ್ಣವಾಗಿ ಭಾಷಣ ಮಾಡಿದ್ದಾನೆ. ತಾಯಿಯ ತ್ಯಾಗ, ಆಕೆಯ ಪ್ರೀತಿ ಮತ್ತು ಇಸ್ಲಾಂ ಧರ್ಮದಲ್ಲಿ ತಾಯಿಗೆ ನೀಡಲಾಗಿರುವ ಶ್ರೇಷ್ಠ ಸ್ಥಾನಮಾನಗಳನ್ನು ಬಾಲಕ ವಿವರಿಸಿದ ರೀತಿ ನೆರೆದಿದ್ದ ಸಭಿಕರನ್ನು ಮಂತ್ರಮುಗ್ಧಗೊಳಿಸಿತು.
ಭಾಷಣದ ನಡುವೆ ಆತ ಉಲ್ಲೇಖಿಸಿದ ಉದಾಹರಣೆಗಳು ಹಾಗೂ ವಿಚಾರಗಳನ್ನು ಮಂಡಿಸಿದ ಶೈಲಿ ಕೇವಲ 10 ವರ್ಷದ ಮಗುವಿನ ಮಾತುಗಳಂತೆ ಇರಲಿಲ್ಲ, ಬದಲಿಗೆ ಒಬ್ಬ ಪರಿಣಿತ ವಾಗ್ಮಿಯಂತೆ ಕಂಡುಬಂತು ಎಂದು ಕಾರ್ಯಕ್ರಮದಲ್ಲಿದ್ದವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಸದ್ಯ ಈ ಭಾಷಣದ ವಿಡಿಯೋ ತುಣುಕುಗಳು ವಾಟ್ಸಾಪ್, ಫೇಸ್ಬುಕ್ ಹಾಗೂ ಇನ್ಸ್ಟಾಗ್ರಾಮ್ ಸೇರಿದಂತೆ ವಿವಿಧ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿವೆ. ಸಣ್ಣ ವಯಸ್ಸಿನಲ್ಲೇ ಇಂತಹ ಸಂಸ್ಕಾರಯುತ ಮತ್ತು ಅರ್ಥಪೂರ್ಣ ಮಾತುಗಳನ್ನಾಡಿದ ಬಾಲಕನ ಧೈರ್ಯ ಹಾಗೂ ಜ್ಞಾನಕ್ಕೆ ನೆಟ್ಟಿಗರು ಕೊಂಡಾಡುತ್ತಿದ್ದಾರೆ.
”ಇಂದಿನ ಪೀಳಿಗೆಗೆ ತಂದೆ-ತಾಯಂದಿರನ್ನು ಗೌರವಿಸುವ ವಿಚಾರದಲ್ಲಿ ಈ ಬಾಲಕನ ಮಾತುಗಳು ದಾರಿದೀಪ,” ಎಂದು ಅನೇಕರು ಕಾಮೆಂಟ್ ಮಾಡುತ್ತಿದ್ದು, ಬಾಲಕ ಮೊಹಮ್ಮದ್ ಅಬ್ದುಲ್ಲಾನ ಉಜ್ವಲ ಭವಿಷ್ಯಕ್ಕೆ ಶುಭ ಹಾರೈಸುತ್ತಿದ್ದಾರೆ.
